Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 89: Yesus e krin a tempel

Tori 89: Yesus e krin a tempel

A GERSI leki Yesus ati e bron dya trutru, a no so? Yu sabi fu san ede en ati e bron so? Fu di den man na a tempel fu Yehovah na Yerusalem gridi gi moni. Den e pruberi fu meki furu moni na den sma di e kon dya fu anbegi Gado.

Yesus e drai den tafra nanga moni trowe

Yu e si ala den yongu mankaw nanga skapu nanga doifi dati? We, den man e seri den meti disi leti dya na a tempel. Yu sabi fu san ede? Na fu di den Israelsma abi meti nanga fowru fanowdu fu tyari ofrandi gi Gado.

Na ini a wet fu Gado ben tanapu, taki efu wan Israelsma ben du wan fowtu sani, a ben musu tyari wan ofrandi gi Gado. Tra ten ben de tu taki Israelsma ben musu tyari ofrandi. Ma pe wan Israelsma ben kan feni fowru nanga meti fu tyari ofrandi gi Gado?

Son Israelsma ben abi den eigi fowru nanga meti. Fu dati ede den ben man tyari den leki ofrandi. Ma furu Israelsma no ben abi den eigi meti noso fowru. Èn trawan ben libi so fara fu Yerusalem taki den no ben man tyari wan fu den meti fu den go na a tempel. Dati meki den sma ben kon dya èn ben bai den meti noso fowru di den ben abi fanowdu. Ma den man disi ben e aksi den sma tumusi furu moni. Den ben e fufuru den sma. Boiti fu dati, den no ben musu seri sani leti dya na a tempel fu Gado.

Na disi e meki Yesus ati e bron. Dati meki a e drai den tafra nanga moni fu den man trowe èn den sensi fu den e panya na ala sei. Sosrefi a e meki wan wipi fu titei èn a e yagi ala den meti puru na a tempel. A e taigi den man di e seri doifi: ’Teki den puru dya! Un musu kaba fu meki a oso fu mi Tata tron wan presi fu meki furu moni.’

Sonwan fu Yesus bakaman de dya nanga en na a tempel na Yerusalem. Den e fruwondru fu san Yesus e du. Dan den e memre a presi na ini Bijbel pe e taki fu a Manpikin fu Gado: ’A lobi fu na oso fu Gado sa leti na ini en leki wan faya.’

Na ini a pisi ten di Yesus de dya na Yerusalem na a Paskafesa, a e du furu wondru. Baka dati Yesus e gowe libi Yudea èn a e go baka na Galilea. Ma te a de na pasi e go drape, dan a e pasa Samaria. Meki wi go luku san e pasa drape.

Yohanes 2:13-25; 4:3, 4.



Aksi

  • Fu san ede sma e seri meti na a tempel?
  • San e meki taki Yesus atibron?
  • San Yesus e du na tapu a prenki, èn sortu komando a e gi den man di e seri doifi?
  • Te den bakaman fu Yesus e si san a e du, dan na san dati e memre den?
  • Na sortu distrikt Yesus e pasa te a e drai go baka na Galilea?

Ete wan aksi

Kon sabi moro

YESUS​—EN NA A PASI, EN NA SAN TRU, EN NA A LIBI

Yesus e sori taki a de fayafaya gi a tru anbegi

Efu Gado Wet ben taki dati den sma ben kan bai meti na ini Yerusalem fu tyari leki ofrandi, dan fu san ede Yesus ati bron nanga den bisnisman na ini a tempel?