Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 88: Yohanes e dopu Yesus

Tori 88: Yohanes e dopu Yesus

LUKU fa a doifi e saka kon na tapu na ede fu a man. A man na Yesus. A abi sowan 30 yari now. Èn a man di de nanga en na Yohanes. Wi ben yere kaba fu Yohanes. Yu e memre ete di Maria ben go luku en famiri Elisabet, taki a beibi na ini a bere fu Elisabet ben dyompo fu prisiri ede? A beibi dati, di ben musu gebore ete, ben de Yohanes. Ma san Yohanes nanga Yesus e du now?

Yesus e dopu

Didyonsrode Yohanes saka Yesus go na ini a watra fu Yordanliba. Disi na fa wan sma e kisi dopu. Den e saka a sma go na ondro watra fosi, dan den e opo en kon na tapu baka. Fu di Yohanes e dopu sma, meki den e kari en Yohanes a Dopuman. Ma fu san ede Yohanes dopu Yesus?

We, Yohanes dopu Yesus fu di Yesus ben kon aksi Yohanes fu dopu en. Yohanes e dopu sma di wani sori taki den e firi sari fu den ogri sani di den du. Ma oiti Yesus ben du wan ogri sani, di a ben musu firi sari fu en? Nôno, bika en na Gado eigi Manpikin di ben komoto na hemel kon. Na fu wan tra sani ede meki a ben aksi Yohanes fu dopu en. Meki wi go luku san ben de a sani dati.

Bifo Yesus ben kon dya na Yohanes, a ben de wan temreman. Wan temreman na wan sma di e meki sani fu udu, soleki tafra, sturu nanga bangi. Maria masra, Yosef, ben de wan temreman èn a ben leri Yesus a temrewroko fu Yesus de wan temreman tu. Ma Yehovah no ben seni en Manpikin kon na grontapu fu de wan temreman. A abi wan spesrutu wroko gi en fu du, èn now a ten doro gi Yesus fu bigin nanga a wroko dati. Sobun, fu sori taki a kon fu du a wani fu en Tata, meki Yesus e aksi Yohanes fu dopu en. Gado ben prisiri nanga disi?

Iya, bika baka te Yesus komoto na ondro a watra kon na tapu, wan sten na hemel e taki: ’Disi na mi Manpikin, di mi feni bun.’ A gersi tu taki hemel e opo ensrefi èn a doifi disi e saka kon na tapu Yesus. Ma a no wan trutru doifi. A gersi wan doifi nomo. Fu taki en leti, a de a santa yeye fu Gado.

Now Yesus abi bun furu sani fu go prakseri. Dati meki a e go 40 dei na wan presi pe sma no e libi. Drape Satan e kon na en. Dri tron Satan e pruberi fu kisi Yesus so fara fu pasa den wet fu Gado. Ma Yesus no wani fu du dati.

Baka dati, dan Yesus e drai kon baka, èn a e miti wan tu man di e tron en fosi bakaman noso disipel. Wan tu fu den nen fu den na Andreas, Petrus (di den ben kari Simon tu), Filipus nanga Natanael (di den ben kari Bartolomeyus tu). Yesus nanga den nyun disipel disi e go na a distrikt Galilea. Na Galilea den e tan wan pisi ten na a foto Kana, pe Natanael e libi. Drape Yesus e go na wan bigi trow-oso èn a e du en fosi wondru. Yu sabi san a e du? A e meki watra tron win.

Mateyus 3:13-17; 4:1-11; 13:55; Markus 6:3; Yohanes 1:29-51; 2:1-12.



Aksi

  • Suma na den tu man na tapu a prenki?
  • Fa wan sma e teki dopu?
  • Suma Yohanes e dopu moro furu?
  • Fu sortu aparti sani ede meki Yesus e aksi Yohanes fu dopu en?
  • Fa Gado e sori taki a e prisiri taki Yesus teki dopu?
  • San e pasa te Yesus e go 40 dei na wan presi pe sma no e libi?
  • Suma na wan tu fu den fosi bakaman, noso disipel, fu Yesus? San na a fosi wondru di a e du?

Ete wan tu aksi