Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 87: A pikin Yesus na ini a tempel

Tori 87: A pikin Yesus na ini a tempel

LUKU fa a yongu boi e taki nanga den owru man disi. Den na leriman na a tempel fu Gado na Yerusalem. Èn a boi na Yesus. A kon moro bigi pikinso. Now a abi 12 yari.

Den leriman e fruwondru taki Yesus sabi someni sani fu Gado nanga san skrifi na ini Bijbel. Ma fu san ede Yosef nanga Maria no de dya tu? Pe den de? Meki wi go luku.

Pikin Yesus e taki nanga den leriman

Ibri yari Yosef e go nanga en osofamiri na Yerusalem fu nyan a spesrutu fesa di nen Paska. A de wan langa pasi fu waka fu Nasaret go na Yerusalem. Nowan sma abi wan oto èn loko no de tu. Den no ben abi den sani disi na ini den dei dati. Moro furu sma e waka nanga futu èn a e teki den dri dei fu doro Yerusalem.

Yosef abi wan bigi osofamiri now. Sobun Yosef nanga Maria musu luku den yongu brada nanga sisa fu Yesus. We, a yari disi den bigin waka a langa pasi go baka na Nasaret nanga den pikin fu den. Den e prakseri taki Yesus e waka makandra nanga den tra sma. Ma te den tapu nanga waka na a kaba fu a dei, dan den no man feni Yesus. Den e suku en na mindri den famiri nanga mati, ma a no de na den! Fu dati ede den e go baka na Yerusalem fu suku Yesus drape.

Te fu kaba den e feni Yesus dya na den leriman. A e arki den leriman èn a e poti aksi gi den. Ala den sma e fruwondru o koni Yesus de. Ma Maria e taki: ’Pikin, fu san ede yu du unu disi? Yu papa nanga mi ben suku yu nanga dyompo-ati.’

’Fu san ede yu ben musu suku mi?’ Yesus e piki. ’Yu no ben sabi taki mi musu de na a oso fu mi papa?’

Iya, Yesus lobi fu de pe a man leri moro fu Gado. A no so wi musu de tu? Te den de na oso baka na Nasaret, dan Yesus e go ibri wiki na konmakandra fu anbegi Gado. Fu di ala ten a ben arki bun, meki a ben leri bun furu sani fu Bijbel. Meki wi de leki Yesus èn waka baka na eksempre fu en.

Lukas 2:41-52; Mateyus 13:53-56.



Aksi

  • Omeni yari Yesus abi na tapu a prenki, èn pe a de?
  • San Yosef e du nanga en osofamiri ibri yari?
  • Baka di Yosef nanga Maria waka wan heri dei go baka na oso, dan fu san ede den e drai go baka na Yerusalem?
  • Pe Yosef nanga Maria e feni Yesus, èn fu san ede den sma drape e fruwondru?
  • San Yesus e taigi en mama Maria?
  • Fa wi kan de leki Yesus te wi e leri sani fu Gado?

Ete wan tu aksi