Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 86: Wan stari e sori a pasi

Tori 86: Wan stari e sori a pasi
Man di e ondrosuku den stari fu sabi san o pasa

YU E si a krin stari dati di wan fu den man e sori go na en? A stari ben de fu si di den ben e gowe libi Yerusalem. Den man disi de fu owstusei èn den e studeri den stari. Den e bribi taki a nyun stari disi e tyari den go na wan prenspari sma.

Di den man ben doro na Yerusalem, den ben aksi: ’Pe a pikin de, di sa tron kownu fu den Dyu?’ ’Dyu’ na wan tra nen gi Israelsma. ’Wi ben si a stari fu a pikin fu a fosi tron di wi ben de na owstusei’, den man ben taki, ’èn wi kon fu anbegi a pikin.’

Di Herodes, di de kownu na Yerusalem, ben yere fu a tori disi, dan a ben kon bruya. A no ben wani, taki wan tra sma ben musu tron kownu na en presi. Fu dati ede Herodes ben seni kari den priester edeman èn a ben aksi: ’Pe a pramisi kownu en mama sa meki en?’ Den ben piki: ’Bijbel e taki na Betlehem.’

Fu dati ede Herodes ben kari den man fu owstusei èn ben taki: ’Go suku a yongu pikin. Te unu feni en, meki mi sabi. Mi wani go anbegi en tu.’ Ma a tru fu a tori de, taki Herodes ben wani fu kiri a pikin!

Now a stari e buweigi ensrefi na fesi den man go na Betlehem èn a e tapu na tapusei fu a presi pe a pikin de. Te den man e go na ini na oso, dan den e feni Maria nanga a pikin boi Yesus. Den e gi Yesus presenti. Ma bakaten Yehovah e warskow den man na ini wan dren fu no drai go baka na Herodes. Dati meki den e teki wan tra pasi go baka na a kondre fu den.

Te Herodes kon sabi taki den man fu owstusei ben drai go baka na oso, dan en ati e bron srefisrefi. Fu dati ede a e gi a komando fu den kiri ala den boi na Betlehem, bigin fu tu yari go na ondro. Ma Yehovah e warskow Yosef na fesi na ini wan dren, èn Yosef e gowe nanga en osofamiri na Egepte. Te Yosef yere bakaten taki Herodes dede, dan a e teki Maria nanga Yesus go na Nasaret baka. Na drape Yesus e gro kon bigi.

Suma yu denki meki a nyun stari dati skèin? Prakseri disi, den man go na Yerusalem fosi, baka di den si a stari. Satan Didibri ben wani kiri Gado manpikin, èn a ben sabi taki Kownu Herodes fu Yerusalem ben o pruberi fu kiri a pikin. Dati meki Satan na a sma di ben musu meki a stari dati skèin.

Mateyus 2:1-23; Mika 5:2.



Aksi

  • Suma na den man na tapu a prenki, èn fu san ede wan fu den e sori go na wan stari di e skèin krin?
  • Fu san ede Kownu Herodes e atibron, èn san a e du?
  • Pe a stari di e skèin krin e tyari den man go? Ma fu san ede den e waka wan tra pasi te den e drai go baka na den eigi kondre?
  • Sortu komando Herodes e gi, èn fu san ede?
  • San Yehovah e taigi Yosef fu du?
  • Suma ben meki a nyun stari skèin, èn fu san ede?

Ete wan aksi

Kon sabi moro

YESUS​—EN NA A PASI, EN NA SAN TRU, EN NA A LIBI

Wan tu lukuman e go na Yesus

Fu san ede a stari di den lukuman si na Owstusei no tyari den go langalanga na Yesus? Fu san ede a tyari den go fosi na a ogri-ati kownu Herodes?