Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 85: Yesus gebore na ini wan pen

Tori 85: Yesus gebore na ini wan pen

YU SABI suma na a pikin beibi disi? Iya, na Yesus. Didyonsro en mama meki en na ini wan pen. Wan pen na pe meti e tan. Maria e poti Yesus didon na ini wan nyanyan-baki. Dati na a presi pe den e poti nyanyan gi den buriki nanga den tra meti. Ma fu san ede Maria nanga Yosef de dya nanga den meti? Disi a no wan bun presi fu wan mama kisi wan beibi, a no so?

Nôno, kwetikweti! Ma meki wi go luku fu san ede den de dyaso: A tiriman fu Rome, Kèiser Augustus, ben meki wan wet, taki ibri sma musu drai go na a foto pe en mama meki en, so taki den skrifi en nen na ini wan buku. We, Yosef mama ben meki en dya na Betlehem. Ma di en nanga Maria ben doro drape, dan nowan presi ben de moro gi den. Dati meki den ben musu kon dya na den meti. Èn a dei disi Maria e meki Yesus! Ma ala sani de bun nanga Yesus, soleki fa yu kan si.

Yosef, Maria nanga beibi Yesus

Yu e si den skapuman di e kon luku Yesus? Den ben de na ini sabana na netiten e luku den skapu, ne wan krin faya ben skèin lontu den. A ben de wan engel! Den skapuman ben frede tumusi. Ma na engel ben taki: ’No frede! Mi abi bun nyunsu gi unu. Tide, Krestes a Masra ben gebore na Betlehem. A sa meki den sma kon fri! Unu sa feni en domrudomru na ini duku na ini wan nyanyan-baki.’ Wantronso furu engel ben kon èn ben bigin fu prèise Gado. Wantewante den skapuman disi e teki pasi go suku Yesus èn now den feni en.

Yu sabi fu san ede Yesus de so prenspari? Yu sabi suma trutru na en? Soleki fa yu sabi, dan na a fosi tori fu a buku disi, wi ben taki fu a fosi Manpikin fu Gado. A manpikin disi ben wroko makandra nanga Yehovah fu meki hemel nanga grontapu nanga ala tra sani. We, na Yesus na a manpikin disi!

Iya, Yehovah ben puru a libi fu en Manpikin na hemel poti go na ini Maria. Wantewante wan beibi ben bigin gro na Maria bere neleki fa tra beibi e gro na a bere fu den mama fu den. Ma a beibi disi ben de Gado Manpikin. Te fu kaba, Yesus mama ben meki en dya na wan pen na Betlehem. Yu e frustan now fu san ede den engel ben breiti so fu kan fruteri sma taki Yesus mama ben meki en?

Lukas 2:1-20.



Aksi

  • Suma na a pikin beibi na tapu a prenki, èn pe Maria e poti en?
  • Fu san ede Yesus gebore na ini wan pen nanga den meti?
  • Suma na den man na tapu a prenki di e kon na ini a pen, èn san wan engel ben taigi den?
  • Fu san ede Yesus de so prenspari?
  • Fu san ede wi kan kari Yesus a Manpikin fu Gado?

Ete wan tu aksi