Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 84: Wan engel e fisiti Maria

Tori 84: Wan engel e fisiti Maria

A MOI uma disi na Maria. Maria na wan Israel-uma di e libi na a pikin foto Nasaret. Gado sabi taki a de wan tumusi bun uma. Dati meki a e seni en engel Gabrièl go taki nanga en. Yu sabi san Gabrièl kon fruteri Maria? Meki wi go luku.

’Odi, yu uma di Gado blesi’, Gabrièl e taigi en. ’Yehovah de nanga yu.’ Maria no ben si a sma disi noiti na fesi ete. Maria e broko en ede, bika a no sabi san a man wani taigi en. Ma Gabrièl e korostu en ati wantewante.

Maria

’No frede, Maria’, a e taki. ’Yehovah abi prisiri so te nanga yu. Dati meki a o du wan wondru sani gi yu. Heri esi yu sa kisi wan beibi. Èn yu musu kari en Yesus.’

Dan Gabrièl e go moro fara fu taki: ’A pikin disi sa de tumusi prenspari èn den sa kari en a Manpikin fu a Moro Hei Gado. Yehovah sa meki a tron kownu, neleki David. Ma Yesus sa de kownu fu têgo, èn noiti wan kaba no sa kon na en kownukondre.’

’Fa disi sa pasa?’ Maria e aksi. ’Mi no trow srefi. Mi no e libi nanga wan man, sobun fa mi kan kisi wan beibi dan?’

’A krakti fu Gado sa kon na yu tapu’, Gabrièl e piki. ’Dati meki den sa kari a pikin a Manpikin fu Gado.’ Dan a e taigi Maria: ’Prakseri yu famiri Elisabet. Sma ben taki dati a ben de tumusi owru fu kisi pikin. Ma now heri esi a sa kisi wan manpikin. Na so yu e si taki noti no de san Gado no man du.’

Wantewante Maria e taki: ’Mi na Yehovah umasrafu! Meki a pasa nanga mi soleki fa yu taki.’ Dan na engel e gowe.

Maria e du esi-esi fu go luku Elisabet. Te Elisabet e yere a sten fu Maria, dan a beibi e dyompo na ini Elisabet bere fu prisiri ede. Elisabet e kon furu nanga Gado yeye èn a e taigi Maria: ’Gado blesi yu srefisrefi na mindri den uma.’ Maria e tan sowan dri mun nanga Elisabet, dan a e go baka na Nasaret.

Maria abi mofo fu trow nanga wan man di nen Yosef. Ma te Yosef e yere taki Maria o kisi wan beibi, dan a e feni taki a no musu trow nanga Maria. Dan Yehovah engel e taigi en: ’No frede fu teki Maria leki yu uma, bika na Gado gi en wan manpikin.’ Sobun, Maria nanga Yosef e trow èn den e wakti fu Yesus kon gebore.

Lukas 1:26-56; Mateyus 1:18-25.



Aksi

  • Suma na a uma na tapu a prenki?
  • San Gabrièl e taigi Maria?
  • Fa Gabrièl e fruteri Maria taki a sa kisi wan beibi aladi a no libi nanga wan man?
  • San e pasa te Maria e go luku en famiri Elisabet?
  • San Yosef e prakseri te a e yere taki Maria o kisi wan beibi, ma fu san ede a e kenki prakseri?

Ete wan tu aksi

Kon sabi moro

YESUS​—EN NA A PASI, EN NA SAN TRU, EN NA A LIBI

Tu boskopu fu Gado

Na engel Gabrièl tyari boskopu di sma no ben wani bribi wantewante.

TEKI NA EKSEMPRE FU SMA DI BEN ABI BRIBI

Maria​—„Luku, mi na a umasrafu fu Yehovah!”

Fa den sani di Maria taigi na engel e sori taki a ben abi bribi? Sortu tra moi fasi a sori?