Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 98: Yesus na tapu na Olèifbergi

Tori 98: Yesus na tapu na Olèifbergi

DYASO yu e si Yesus na tapu na Olèifbergi. Den fo man di de nanga en na en apostel. Den na den brada Andreas nanga Petrus èn sosrefi den brada Yakobus nanga Yohanes. Farawe yu e si a tempel fu Gado na Yerusalem.

A de tu dei pasa kaba di Yesus ben rèi na tapu a yongu buriki go na Yerusalem. A de tudewroko now. Frukufruku kaba na a dei dati Yesus ben de na a tempel. Drape den priester ben pruberi fu grabu Yesus fu kiri en. Ma den ben frede fu du disi fu di a pipel lobi Yesus.

Yesus nanga den apostel fu en

’Un sneki, nanga snekipikin’, Yesus ben kari den kerki fesiman dati. Dan Yesus ben taigi den taki Gado sa strafu den fu ala den takru sani di den ben du. Baka dati, Yesus ben go na Olèifbergi èn dan den fo apostel disi ben bigin fu poti aksi gi en. Yu sabi san den e aksi Yesus?

Den apostel e poti aksi di abi fu du nanga sani fu a ten di e kon. Den sabi taki Yesus sa meki wan kaba kon na ala ogri na grontapu. Ma den wani sabi o ten dati o pasa. O ten Yesus sa kon baka fu tiri leki Kownu?

Yesus sabi taki en bakaman na grontapu no sa man fu si en te a e kon baka. Disi de so, bika a sa de na hemel èn den no sa man fu si en drape. Fu dati ede Yesus e fruteri en apostel wan tu fu den sani di sa pasa na grontapu, te en sa tiri leki Kownu na hemel. San na wan tu fu den sani disi?

Yesus e taki dati bigi feti sa de, furu sma sa siki èn abi angri, ogri sa kon moro furu èn bigi gronseki sa de. Yesus e taki tu, dati a bun nyunsu fu Gado Kownukondre sa preiki na ala sei na grontapu. Wi e si ala den sani disi e pasa na ini wi ten? Iya! Fu dati ede wi kan de seiker taki Yesus e tiri now na hemel. Heri esi a sa tyari wan kaba kon na ala ogridu na grontapu.

Mateyus 21:4623:1-39; 24:1-14; Markus 13:3-10.



Aksi

  • Sortuwan fu den man na tapu a prenki na Yesus, èn suma de nanga en?
  • San den priester ben pruberi fu du nanga Yesus na ini a tempel, èn san a ben taigi den?
  • San den apostel e aksi Yesus?
  • Fu san ede Yesus e fruteri den apostel fu en wan tu fu den sani di o pasa na grontapu te a e tiri leki Kownu na hemel?
  • Soleki fa Yesus taki, dan san o pasa bifo a tyari wan kaba kon na ala ogridu na grontapu?

Ete wan tu aksi