Gado ben seni na engel Gabrièl go na wan yongu uma di ben nen Maria. Maria ben de wan tumusi bun uma. Na engel ben fruteri en taki a ben o kisi wan pikin, di ben o tiri fu têgo leki kownu. Maria ben meki beibi Yesus na wan pen, pe skapuman ben go luku en. Bakaten, wan stari ben sori wan tu man fu owstusei a pasi fu go na a yongu pikin. Wi o kon sabi suma ben meki den si a stari dati èn fa den muiti fu kiri Yesus ben misi a marki.

Dan te Yesus abi 12 yari, wi e feni en na a tempel e taki nanga den leriman. Tina-aiti yari na baka, Yesus ben teki dopu èn baka dati a ben bigin fu preiki èn leri sma fu a Kownukondre. Gado ben seni en kon na grontapu fu du a wroko disi. Yesus ben teki 12 man fu yepi en du a wroko disi èn a ben meki den tron en apostel.

Yesus ben du furu wondru tu. A ben gi dusundusun sma nyanyan nanga soso wan tu fisi nanga wan tu brede. A ben dresi sikiman èn a ben opo srefi dedewan. Te fu kaba wi e kon leri fu den furu sani di Yesus ben miti na a lasti dei fu en libi èn fa sma ben kiri en. A ben preiki sowan dri nanga afu yari, sobun Pisi 6 o luku wan pisi ten fu pikinso moro leki 34 yari.

Yesus e gi leri