Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 80: A pipel fu Gado e gowe libi Babilon

Tori 80: A pipel fu Gado e gowe libi Babilon

PIKINMORO tu yari ben pasa sensi den Mediasma nanga den Persiasma ben wini Babilon. Èn luku san e pasa now! Iya, den Israelsma e gowe libi Babilon. Fa den du kon fri? Suma ben meki den gowe?

A ben de Sirus, a kownu fu Persia, di ben meki den gowe. Langa bifo Sirus mama ben meki en, dan Yehovah ben meki a profeiti Yesaya skrifi fu Sirus: ’Yu sa du mi wani. Den doro sa tan opo, so taki yu man wini a foto.’ Èn Sirus ben teki fesi trutru na ini na wini di den wini Babilon. Na netiten a legre fu Media nanga Persia ben hari pasa den doro, di ben tan opo, go na ini na foto.

Ma Yehovah profeiti Yesaya ben taki tu, dati Sirus ben sa gi a komando fu bow Yerusalem nanga en tempel nyun baka. Sirus ben gi a komando dati? Iya, a ben taigi den Israelsma: ’Go now na Yerusalem èn bow a tempel fu Yehovah, un Gado.’ Na dati de soifri san den Israelsma e go du now.

Den Israelsma e gowe libi Babilon

Ma a no ala Israelsma na Babilon man fu waka a langa pasi go na Yerusalem. A de wan bun langa pasi fu 800 kilometer, èn furu fu den owru tumusi noso siki tumusi fu waka so fara. Tra sani meki sonwan no e go tu. Ma Sirus e taigi den wan di no e go: ’Gi solfru nanga gowtu nanga tra presenti na den sma di e drai gowe fu bow Yerusalem nanga en tempel.’

Na so den Israelsma disi, di de na pasi e go na Yerusalem, e kisi furu presenti. Sirus e gi den den preti nanga kan tu, di Kownu Nebukadnesar ben teki na a tempel fu Yehovah, di a ben pori Yerusalem. A pipel abi wan lo sani fu tyari gowe nanga den.

Baka sowan fo mun di den waka, dan den Israelsma e kon na Yerusalem na a reti ten. A de soifri 70 yari sensi a foto ben kisi pori, so taki nowan libisma ben tan abra na a kondre. Ma aladi den Israelsma de baka na den kondre, toku den sa abi wan tu muilek ten, soleki fa wi sa si.

Yesaya 44:28; 45:1-4; Esra 1:1-11.



Aksi

  • San den Israelsma e du, soleki fa a prenki e sori?
  • Fa Sirus meki a profeititori kon tru di Yehovah ben taki nanga yepi fu Yesaya?
  • San Sirus e taigi den Israelsma di no man drai go baka na Yerusalem?
  • San Sirus e gi a pipel fu tyari go baka na Yerusalem?
  • O langa a e teki den Israelsma fu doro baka na Yerusalem?
  • Omeni yari pasa sensi a ten di nowan sma ben de na ini a kondre moro?

Ete wan tu aksi