Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 77: Den no ben wani fu boigi

Tori 77: Den no ben wani fu boigi

YU SABI den dri yonkuman disi ete? Iya, na den dri mati fu Danièl, di ben weigri fu nyan san no ben bun gi den. Den Babilonsma ben kari den Sadrak, Meisak nanga Abedneikow. Ma luku den now! San meki den no e boigi na fesi a bigi popki disi leki ala tra sma? Meki wi go luku.

Yu e memre den wet ete di Yehovah srefi ben skrifi, den Tin Komando? A fosiwan fu den e taki: ’Yu no mag anbegi nowan tra gado leki mi wawan.’ Den yonkuman dya e gi yesi na a wet disi, aladi a no de wan makriki sani fu du.

Nebukadnesar, a kownu fu Babilon, kari furu prenspari sma kon fu gi grani na a popki disi di a meki. Didyonsro a ben kaba taigi ala den sma: ’Te unu yere den tutu, den harpu nanga ala den tra sani fu prei poku, dan un musu boigi èn anbegi a gowtu popki disi. Iniwan sma di no boigi èn anbegi, den sa iti en wantewante go na ini wan bun faya onfu.’

Te Nebukadnesar kon sabi taki Sadrak, Meisak nanga Abedneikow no ben boigi, dan en ati e bron tumusi. A e meki den tyari den kon na en. A e gi den ete wan okasi fu boigi. Ma den yonkuman e frutrow tapu Yehovah: ’A Gado fu wi di wi e dini, man frulusu wi’, den e taigi Nebukadnesar. ’Ma srefi efu a no frulusu wi, dan toku wi no sa boigi na fesi a gowtu popki fu yu.’

Sadrak, Meisak nanga Abedneikow

Te Nebukadnesar e yere disi, dan en ati e bron moro. Wan onfu de na ini a birti èn a e gi komando: ’Meki na onfu kon seibi tron moro faya leki bifo.’ Dan a e meki den moro tranga man fu en legre tai Sadrak, Meisak nanga Abedneikow èn iti den go na ini na onfu. Na onfu de so faya, taki a faya e kiri den tranga man. Ma san e pasa nanga den dri yonkuman di den ben iti go na ini na onfu?

A kownu e luku go na ini na onfu èn a e kon frede srefisrefi. ’A no dri man wi tai èn iti go na ini a faya onfu?’ a e aksi.

’Iya’, den futuboi e piki.

’Ma mi e si fo man e waka lontu na ini a faya’, a e taki. ’Den no tai èn a faya no e du den noti. Èn a di fu fo tan leki wan gado.’ A kownu e waka go moro krosibei na a doro fu na onfu èn e bari, taki: ’Sadrak! Meisak! Abedneikow! Kon na doro, un futuboi fu a Moro Hei Gado!’

Te den kon na doro, dan ibriwan sma kan si taki noti no pasa nanga den. Dan a kownu e taki: ’Meki wi prèise a Gado fu Sadrak, Meisak nanga Abedneikow! A seni en engel kon frulusu den, fu di den no ben wani boigi èn anbegi nowan tra gado leki den eigi Gado.’

Disi a no wan moi eksempre fu getrowfasi na Yehovah, di wi kan waka na en baka?

Exodus 20:3; Danièl 3:1-30.



Aksi

  • Sortu komando Nebukadnesar, a kownu fu Babilon, gi a pipel?
  • Fu san ede den dri mati fu Danièl no e boigi gi a gowtu popki?
  • Fa den dri Hebrew yonguman e sori taki den e frutrow tapu Yehovah te Nebukadnesar e gi den wan tra okasi fu boigi gi a popki?
  • San Nebukadnesar e meki den man fu en du nanga Sadrak, Meisak, nanga Abedneikow?
  • San Nebukadnesar e si te a e luku go na ini na onfu?
  • Fu san ede a kownu e prèise a Gado fu Sadrak, Meisak, nanga Abedneikow, èn sortu eksempre den e gi wi?

Ete wan tu aksi