Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 68: Tu boi di kon na libi baka

Tori 68: Tu boi di kon na libi baka

EFU yu ben dede, fa yu mama ben sa firi efu yu ben kon na libi baka? Yu mama ben sa de tumusi koloku! Ma wan sma di dede, kan kon na libi baka? Dati pasa wan dei kaba?

Luku a man dya, nanga na uma nanga a pikin boi. A man na a profeiti Elia. Na uma na wan weduwe fu a foto Sarfat èn a boi na en manpikin. We, wan dei a boi kon siki. A siki kon ogri moromoro teleki a boi e dede. Dan Elia e taigi na uma: ’Gi mi a boi.’

Elia, wan weduwe nanga a manpikin fu en di kon na libi baka

Elia e teki a dede pikin tyari go na sodro èn e poti en na tapu bedi. Dan a e begi: ’O Yehovah, meki a boi kon na libi baka.’ A boi e bigin fu hari blo! Dan Elia e tyari en go na gron èn a e taigi na uma: ’Luku yu manpikin e libi baka!’ Dati meki a mama de so koloku.

Wan tra prenspari profeiti fu Yehovah na Elisa. A e dini leki a yepiman fu Elia. Ma baka wan pisi ten Yehovah e gebroiki Elisa tu fu du wondru. Wan dei Elisa e go na a foto Sunem, pe wan uma e sori tumusi switifasi gi en. Bakaten na uma disi e kisi wan boi.

Baka di a boi kon bigi, dan a e go wan mamanten na en papa di e wroko na gron. Wantronso a boi e bari: ’Mi ede e hati mi!’ Baka di den tyari en go na oso, a e dede. En mama e sari srefisrefi! Wantewante a mama e go teki Elisa kon.

Te Elisa e doro, dan a e go na a kamra nanga a dede pikin. A e begi Yehovah èn a e go didon na tapu a skin. Heri esi a skin fu a boi e kon waran èn a e meki seibi tron etsyei. Fa a mama de koloku te a e kon na inisei èn e si taki a boi fu en e libi!

Bun furu sma dede èn disi gi den famiri nanga mati fu den furu sari. Wi no abi a makti fu opo dedesma kon na libi baka, ma Yehovah man du dati. Bakaten wi sa yere fa a sa meki milyunmilyun sma kon na libi baka.

1 Kownu 17:8-24; 2 Kownu 4:8-37.


Aksi

  • Suma na den dri sma na tapu a prenki, èn san e pasa nanga a pikin boi?
  • San Elia e begi Gado fu du gi a boi, èn san e pasa baka dati?
  • Fa a yepiman fu Elia nen?
  • Fu san ede wan uma fu Sunem kari Elisa kon na en oso?
  • San Elisa e du, èn san e pasa nanga a pikin di dede?
  • Sortu makti Yehovah abi, soleki fa a sori nanga yepi fu Elia nanga Elisa?

Ete wan tu aksi