Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 67: Yosafat e frutrow tapu Yehovah

Tori 67: Yosafat e frutrow tapu Yehovah

YU SABI suma na den man disi èn san den e du? Den e go na feti, èn den man drape na fesisei e singi. Ma kande yu e aksi: ’Fu san ede den singiman no abi feti-owru nanga lansri fu feti?’ Meki wi go luku.

Den Israelsma e hari go feti

Yosafat na a kownu fu a tu-lo kownukondre fu Israel. A e libi na ini a srefi ten leki Kownu Akab nanga Iseibel fu a tin-lo kownukondre na noordsei. Ma Yosafat na wan bun kownu. En papa Asa ben de wan bun kownu tu. Dati meki a pipel fu a tu-lo kownukondre na zuidsei abi en bun.

Ma now wan sani e pasa di e meki a pipel kon frede. Boskopuman e kon taigi Yosafat: ’Wan bigi legre fu den kondre Moab, Amon nanga a bergikondre Seir e kon feti nanga yu.’ Furu Israelsma e kon makandra na Yerusalem fu suku a yepi fu Yehovah. Den e go na a tempel èn drape Yosafat e begi: ’O Yehovah, wi Gado, wi no sabi san fu du. Wi no man du noti nanga a bigi legre disi. Wi e luku go na yu fu feni yepi.’

Yehovah e arki èn a e meki wan fu en futuboi taigi a pipel: ’A feti a no fu unu, ma na fu Gado. Unu no sa abi fu feti. Tan luku nomo èn si fa Yehovah sa frulusu unu.’

A tra mamanten fu dati ede Yosafat e taigi a pipel: ’Frutrow tapu Yehovah!’ Dan a e meki singiman waka na fesi den srudati fu en. Aladi den e waka go, dan den e prèise Yehovah nanga singi. Yu sabi san e pasa te den doro krosibei na a feti? Yehovah e meki den srudati fu den feanti feti nanga makandra. Èn te den Israelsma doro, dan ala srudati fu den feanti dede!

A no ben de wan koni sani taki Yosafat ben frutrow tapu Yehovah? Wi sa sori taki wi koni efu wi frutrow tapu En tu.

1 Kownu 22:41-53; 2 Kroniki 20:1-30.


Aksi

  • Suma na Yosafat, èn na ini sortu pisi ten a e libi?
  • Fu san ede den Israelsma frede, èn san furu fu den e du?
  • Fa Yehovah e gi piki tapu a begi fu Yosafat?
  • San Yehovah e meki pasa bifo a feti?
  • San wi kan leri fu Yosafat?

Ete wan tu aksi