Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 66: Na ogri Umakownu Iseibel

Tori 66: Na ogri Umakownu Iseibel

BAKA a dede fu Kownu Yerobeam, dan soso ogri kownu e tiri a tin-lo kownukondre Israèl na noordsei. Kownu Akab na a moro ogriwan fu den alamala. Yu sabi fu san ede? Wan prenspari reide fu dati na a uma fu en, na ogri Umakownu Iseibel.

Iseibel a no wan Israel-uma. En na a umapikin fu a kownu fu Sidon. A e anbegi a falsi gado Bâal èn a e tyari Akab nanga furu Israelsma go so fara fu anbegi Bâal tu. Iseibel no wani si Yehovah na ai èn e kiri furu fu Yehovah profeiti. Trawan fu den musu kibri na bergi-olo fu a no kiri den. Efu Iseibel wani wan sani, dan a sa kiri wan sma srefi fu kisi en.

Wan dei Kownu Akab e sari tumusi. Fu dati ede Iseibel e aksi en: ’Fu san ede yu e sari so tide?’

’Na fu san Nabot taigi mi meki mi e sari’, Akab e piki. ’Mi ben wani bai en droifidyari, ma a ben taigi mi taki mi no ben kan kisi en.’

’No broko yu ede’, Iseibel e taki. ’Mi sa meki yu kisi en.’

Fu dati ede Iseibel e skrifi brifi gi wan tu fu den prenspari man fu a foto pe Nabot e libi. ’Meki wan tu bun-fu-noti man fruteri, taki Nabot fluku Gado èn a kownu’, a e taigi den. ’Dan tyari en go na dorosei fu a foto èn ston en kiri.’

So esi leki Iseibel yere taki Nabot dede, dan a e taigi Akab: ’Go teki en droifidyari.’ Yu no e feni taki Iseibel musu kisi strafu fu so wan ogri?

Umakownu Iseibel

Fu dati ede, baka wan pisi ten, Yehovah e seni Yehu fu strafu en. Te Iseibel e yere taki Yehu de a pasi e kon, a e ferfi en ai èn e pruberi fu meki ensrefi moi. Ma te Yehu doro èn e si Iseibel na a fensre, a e bari gi den man na ini a palèisi: ’Iti en kon na gron!’ Den man e du dati, soleki fa yu e si na tapu a prenki. Den e iti en go na gron èn a e dede. Dati na a kaba fu na ogri Umakownu Iseibel.

1 Kownu 16:29-33; 18:1-4; 21:1-16; 2 Kownu 9:30-37.



Aksi

  • Suma na Iseibel?
  • Fu san ede Kownu Akab e sari wan dei?
  • San Iseibel e du fu kan kisi a droifidyari fu Nabot gi en masra Akab?
  • Suma Yehovah e seni fu strafu Iseibel?
  • Soleki fa yu kan si na tapu a prenki, dan san e pasa te Yehu e doro na a palèisi fu Iseibel?

Ete wan tu aksi