Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 65: A kownukondre e prati

Tori 65: A kownukondre e prati

YU SABI fu san ede a man disi e priti en dyakti na pisipisi? Na Yehovah ben taigi en fu du disi. A man disi na Ahia, wan profeiti fu Gado. Yu sabi suma na wan profeiti? Wan profeiti na wan sma di Gado e fruteri na fesi san o pasa.

Ahia nanga Yerobeam

Ahia e taki dya nanga Yerobeam. Yerobeam na wan man di Salomo ben poti leki wan basi fu luku den bow-wroko fu en. Te Ahia e miti Yerobeam dya na tapu a pasi, dan Ahia e du wan freimde sani. A e puru a nyun dyakti di a weri, èn e priti en na 12 pisi. A e taigi Yerobeam: ’Teki tin pisi gi yusrefi.’ Yu sabi fu san ede Ahia e gi Yerobeam tin pisi?

Ahia e tyari kon na krin taki Yehovah o puru a kownukondre na Salomo anu. A e taki dati Yehovah o gi Yerobeam tin lo. Disi wani taki, dati Salomo manpikin Rehabeam sa man tiri soso den tu lo di tan abra.

Te Salomo e yere san Ahia ben taigi Yerobeam, dan en ati e bron srefisrefi. A e pruberi fu kiri Yerobeam. Ma Yerobeam e lon gowe na Egepte. Baka wan pisi ten Salomo e dede. A ben de kownu 40 yari, ma now en manpikin Rehabeam e tron kownu. Yerobeam e yere na Egepte taki Salomo dede; fu dati ede a e kon baka na Israel.

Rehabeam no de wan bun kownu. A e handri moro takru nanga a pipel leki en papa Salomo. Yerobeam nanga wan tu prenspari man e go na Kownu Rehabeam èn e aksi en fu handri na wan moro switi fasi nanga a pipel. Ma Rehabeam no e arki. A e kon de moro takru srefi leki bifo a ten dati. Fu dati ede a pipel e meki Yerobeam tron kownu fu tin lo, ma den tu lo, Benyamin nanga Yuda, e hori Rehabeam leki kownu.

Yerobeam no wani en pipel go na Yerusalem fu anbegi na Yehovah tempel. Fu dati ede a e meki tu gowtu kaw èn e tyari a pipel fu a tin-lo kownukondre go so fara fu anbegi den. Heri esi a kondre e kon furu nanga ogridu nanga tranga.

Problema de tu na a tu-lo kownukondre. A no kisi feifi yari ete, baka di Rehabeam tron kownu, dan a kownu fu Egepte e kon feti nanga Yerusalem. A e teki furu gudu fu Yehovah tempel tyari gowe. Sobun, a tempel e tan soso wan syatu ten leki fa a ben de di den ben bow en.

1 Kownu 11:26-43; 12:1-33; 14:21-31.



Aksi

  • San na den nen fu den tu man na tapu a prenki, èn suma na den man disi?
  • San Ahia e du nanga a mantel di a weri, èn san dati wani taki?
  • San Salomo e pruberi fu du nanga Yerobeam?
  • Fu san ede a pipel e meki Yerobeam tron kownu fu den tin lo?
  • Fu san ede Yerobeam e meki tu pikin kaw fu gowtu, èn san e pasa nanga a kondre wan syatu pisi ten baka dati?
  • San e pasa nanga a tu-lo kownukondre èn nanga a tempel fu Yehovah na ini Yerusalem?

Ete wan tu aksi