Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 64: Salomo e bow a tempel

Tori 64: Salomo e bow a tempel

BIFO David ben dede, a ben gi Salomo den plan di a ben kisi fu Gado fu bow a tempel fu Yehovah. Na ini a di fu fo yari fu en tiri, Salomo e bigin bow a tempel. A e teki seibi nanga afu yari fu a tempel kon klari. Tin dusun nanga tin dusun sma e wroko na a tempel èn na oso e kostu bun furu moni. Disi du kon fu di den e gebroiki someni gowtu nanga solfru gi a tempel.

A tempel abi tu prenspari kamra, neleki a tabernakel. Ma den kamra disi de tu tron so bigi leki den di fu a tabernakel. Salomo e meki den poti na ark fu a frubontu na a bakasei kamra fu a tempel, èn den tra sani di den ben kibri na a tabernakel den e poti na a tra kamra.

Te a tempel kon klari, dan wan bigi fesa e hori. Salomo e kindi na a fesisei fu a tempel èn e begi, soleki fa yu e si na tapu a prenki. ’Srefi a heri hemel no bigi nofo fu hori yu’, Salomo e taigi Yehovah, ’o moro mendri dan a tempel disi kan hori yu. Ma o mi Gado, arki grantangi na a pipel fu yu te den e begi go na a presi disi.’

Kownu Salomo e begi

Te Salomo e kaba fu begi, dan faya e saka komoto na hemel. A e bron den ofrandi fu meti, di sma tyari kon drape. Wan krin leti fu Yehovah e furu a tempel. Disi e sori taki Yehovah e arki èn taki a breiti nanga a tempel èn nanga a begi fu Salomo. A no a tabernakel, ma a tempel e tron a presi now pe a pipel e kon fu anbegi.

Bun langa Salomo e tiri nanga koni èn a pipel de koloku. Ma Salomo e trow nanga furu uma fu tra kondre, di no e anbegi Yehovah. Yu e si fa wan fu den e anbegi wan kruktugado. Te fu kaba den uma fu Salomo e tyari en go so fara taki en e anbegi tra gado tu. Yu sabi san e pasa te Salomo e du disi? A no e handri nanga a pipel na wan switi fasi moro. A e du ogri-ati sani èn a pipel no de koloku moro.

Kownu Salomo e anbegi wan kruktugado

Disi e meki Yehovah ati e bron nanga Salomo èn a e taigi en: ’Mi o puru a kownukondre na yu anu èn gi en na wan tra sma. Mi no o du disi na yu libiten, ma na a ten te yu manpikin o tiri. Ma mi no sa teki ala den sma fu a kownukondre puru na yu manpikin anu.’ Meki wi go luku fa disi e pasa.

1 Kroniki 28:9-21; 29:1-9; 1 Kownu 5:1-18; 2 Kroniki 6:12-42; 7:1-5; 1 Kownu 11:9-13.



Aksi

  • O langa a e teki Salomo fu bow a tempel fu Yehovah, èn fu san ede a bow fu a tempel e kostu so furu moni?
  • Omeni prenspari kamra de na ini a tempel, èn san den e poti na ini a bakasei kamra?
  • San Salomo e taki na ini a begi fu en te den kaba bow a tempel?
  • Fa Yehovah e sori taki a breiti nanga a begi fu Salomo?
  • San den uma fu Salomo e meki a du, èn san e pasa nanga Salomo?
  • Fu san ede Yehovah e atibron nanga Salomo, èn san Yehovah e taigi en?

Ete wan tu aksi