Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 63: A koni Kownu Salomo

Tori 63: A koni Kownu Salomo

SALOMO na wan tini ete te a e tron kownu. A lobi Yehovah èn a e waka baka ala den bun rai di en papa David ben gi en. Yehovah e prisiri nanga Salomo èn fu dati ede a e taigi en wan neti na ini wan dren: ’Salomo, san yu ben sa wani fu mi gi yu?’

Tapu disi Salomo e piki: ’Yehovah, mi Gado, mi de tumusi yongu, èn mi no sabi fa mi musu tiri. Gi mi fu dati ede koni fu tiri yu pipel na a reti fasi.’

Yehovah e prisiri nanga san Salomo e aksi. Fu dati ede a e taki: ’Fu di yu ben aksi fu kisi koni, èn no fu kisi wan langa libi noso gudu, meki mi sa gi yu moro koni leki iniwan sma di ben libi oiti wan ten. Ma mi sa gi yu tu san yu no ben aksi: gudu nanga glori.’

Syatu baka dati tu uma e kon na Salomo nanga wan bigi problema: ’Na uma disi nanga mi e libi na a srefi oso’, wan fu den e taki. ’Mi ben kisi wan boi; tu dei na baka, en sosrefi ben kisi wan boi. Dan wan neti a beibi fu en kon dede. Ma aladi mi ben e sribi, dan a ben poti a dede pikin fu en na mi sei, èn a ben teki a beibi fu mi. Di mi ben wiki èn ben luku a dede pikin, dan mi ben si taki a no ben de a pikin fu mi.’

Tapu disi na tra uma e taki: ’Nôno! A libi pikin na fu mi èn a dedewan na fu en!’ A fosi uma e piki: ’Nôno! A dede pikin na fu yu èn a libiwan na fu mi!’ Na so den uma e krutu. San Salomo sa du?

A e seni teki wan feti-owru, dan di den tyari na owru kon, a e taki: ’Koti a libi pikin na tu pisi èn gi ibriwan fu den uma wan afu pisi.’

’Nôno!’, a trutru mama e bari. ’Grantangi, no kiri a beibi. Gi en a beibi!’ Ma a tra uma e taki: ’No gi a beibi na nowan fu un tu; koti en na tu pisi.’

Kownu Salomo e lusu wan bigi problema

Te fu kaba Salomo e taki: ’No kiri a pikin! Gi en na a fosi uma. Na en na a trutru mama.’ Salomo sabi disi, fu di a trutru mama lobi a beibi so te, taki a de klari fu gi a beibi na a tra uma, so taki den no sa kiri en. Te den sma e yere fa Salomo lusu a problema, dan den e prisiri taki den abi so wan koni kownu.

Na a ten fu a tiri fu Salomo, Gado e blesi a pipel fu di a e meki a gron meki furu tarwe, groto, droifi, figa nanga tra nyanyan. Den sma e weri moi krosi èn e libi na ini bun oso. Ala bun sani de pasa marki gi ala sma.

1 Kownu 3:3-28; 4:29-34.



Aksi

  • San Yehovah e aksi Salomo, èn san Salomo e piki?
  • San Yehovah e pramisi fu gi Salomo fu di a breiti nanga san Salomo aksi en?
  • Nanga sortu bigi problema tu uma e kon na Salomo?
  • Soleki fa yu kan si na tapu a prenki, dan fa Salomo e lusu a problema?
  • Fa sani e waka te Salomo e tiri, èn fu san ede dati de so?

Ete wan tu aksi