Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 62: Problema na ini David oso

Tori 62: Problema na ini David oso

BAKA di David bigin tiri na Yerusalem, dan Yehovah e meki en legre wini den feanti bun furu tron. Yehovah ben pramisi fu gi a kondre Kanan na den Israelsma. Èn now, nanga yepi fu Yehovah, den e kisi te fu kaba a heri kondre di a ben pramisi den.

David na wan bun tiriman. A lobi Yehovah. Fu dati ede, wan fu den fosi sani di a e du te a wini Yerusalem, na fu tyari na ark fu a frubontu fu Yehovah go drape. A wani fu bow wan tempel fu poti na ark na ini.

Te David e kon moro owru, a e meki wan bigi fowtu. David sabi taki a de wan fowtu sani fu teki wan sani di de fu wan tra sma. Ma wan neti te a de na tapu a daki fu en palèisi, a e si wan tumusi moi uma. A nen fu na uma na Batseiba. A masra fu Batseiba na Uria, di de wan fu den srudati fu David.

David wani fu abi Batseiba so te, taki a e meki den tyari en kon na en palèisi. A masra fu Batseiba gowe go feti. David e didon na Batseiba èn bakaten Batseiba e kon sabi taki a de nanga bere. David e broko en ede srefisrefi. A e seni wan mofo go na en legre edeman Yoab fu poti Uria na a fesisei fu a feti, pe den sa kiri en. Te Uria dede, dan David e trow nanga Batseiba.

Yehovah ati e bron srefisrefi nanga David. Fu dati ede a e seni en futuboi Natan fu sori David tapu en fowtu. Drape yu e si fa Natan e taki nanga David. David e sari srefisrefi fu san a du èn dati meki Yehovah no e kiri en. Ma Yehovah e taki: ’Fu di yu du den takru sani disi, meki furu problema sa kon na yu oso.’ Èn problema ben kon srefisrefi tu gi David!

Natan e gi David rai

Na a fosi presi, a manpikin fu Batseiba e dede. Dan a fosi gebore manpikin fu David, Amnon, te a de en wawan nanga en sisa Tamar, e dwengi Tamar fu didon na en. A manpikin fu David, Absalom, ati e bron so te fu dati, taki a e kiri Amnon. Bakaten Absalom e wini na ati fu furu sma fu a pipel èn a e meki sma bariwroko taki a de kownu. Te fu kaba David e wini a feti di den feti nanga Absalom èn den e kiri Absalom. Iya, David abi bun furu problema.

Disiten Batseiba e kisi wan manpikin, di nen Salomo. Te David kon owru èn siki, dan en manpikin Adonia e pruberi fu meki sma bariwroko taki a de kownu. Dan David e meki a priester Sadok kanti oli na tapu na ede fu Salomo fu sori taki Salomo sa de kownu. Syatu baka dati David e dede na a libimarki fu 70 yari. A tiri 40 yari, ma now Salomo de a kownu fu Israel.

2 Samuel 11:1-27; 12:1-18; 1 Kownu 1:1-48.



Aksi

  • San e pasa te fu kaba nanga a kondre Kanan, nanga yepi fu Yehovah?
  • San e pasa wan neti te David de na tapu a daki fu en palèisi?
  • Fu san ede Yehovah ati e bron srefisrefi nanga David?
  • Te yu e luku a prenki, dan suma Yehovah e seni go fu taigi David fu den sondu fu en? San o pasa nanga David soleki fa a man dati e taki?
  • Sortu problema David abi?
  • Suma e tron kownu fu Israel baka David?

Ete wan tu aksi