Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 59: Fu san ede David musu lowe

Tori 59: Fu san ede David musu lowe

BAKA di David kiri Goliat, dan Abner, a legre edeman fu Israel, e tyari en go na Saul. Saul e prisiri srefisrefi nanga David. A e meki a tron wan edeman na ini en legre, èn a e meki a kon libi na en kownu oso.

Bakaten, te den srudati e drai kon fu a feti nanga den Filistiasma, dan den umasma e singi: ’Saul kiri dusun nanga dusun, ma David tin dusun nanga tin dusun.’ Disi e meki Saul dyarusu, bika David e kisi moro grani leki Saul. Ma Saul manpikin Yonatan no e dyarusu. A lobi David so te, èn David lobi en tu. Fu dati ede meki den tu e pramisi makandra taki ala ten den sa tan mati.

Kownu Saul e fringi wan lansri

David e prei harpu bun, èn Saul lobi yere a poku di a e prei. Ma wan dei a dyarusu fu Saul e meki a du wan tumusi ogri sani. Aladi David e prei a harpu, dan Saul e teki en lansri fringi èn e taki: ’Mi sa boro David fasi na a skotu!’ Ma David e dòk èn a lansri e misi en. Bakaten Saul e misi David ete wan tron nanga en lansri. Fu dati ede David sabi now taki a musu luku heri bun.

Yu e memre ete san Saul ben pramisi? A ben taki, dati a ben o gi en umapikin fu trow nanga a man di ben kiri Goliat. Te fu kaba Saul e taigi David taki a kan kisi en umapikin Mikal, ma a musu kiri 100 fu en Filistia feanti fosi. Go prakseri disi pikinso! Saul e howpu trutru taki den Filistiasma sa kiri David. Ma dati no e pasa, èn so Saul e gi en umapikin na David leki wefi.

Wan dei, Saul e taigi Yonatan nanga ala en futuboi taki a wani kiri David. Ma Yonatan e taigi en papa: ’No du David ogri. A no du yu wan ogri noiti. Na presi fu dati, ala san a du, ben de yoisti wan yepi gi yu. Srefi en libi a ben wani gi, di a ben kiri Goliat, èn di yu ben si dati, yu ben prisiri.’

David e dòk èn a lansri e misi en

Saul e arki en manpikin èn a e pramisi fu no du David ogri. Den e tyari David kon baka èn a e dini Saul baka na en oso, soleki fa a ben dini en na fesi. Ma wan dei, te David e prei poku, dan agen Saul e fringi en lansri go na David. David e dòk èn a lansri e boro go na ini a skotu. Dati na a di fu dri tron! Now David sabi taki a musu lowe!

A neti dati David e go na en eigi oso. Ma Saul e seni wan tu man fu kiri en. Mikal sabi san en papa abi na prakseri fu du. Fu dati ede a e taigi en masra: ’Efu yu no gowe dineti, dan tamara yu sa de wan dede man.’ A neti dati Mikal e yepi David pasa na wan fensre lon gowe. Sowan seibi yari langa David musu kibri na a wan presi go na a trawan, so taki Saul no kan feni en.

1 Samuel 18:1-30; 19:1-18.



Aksi

  • Fu san ede Saul e dyarusu tapu David, ma fa Saul en manpikin Yonatan de heri tra fasi?
  • San e pasa wan dei te David e prei harpu gi Saul?
  • San Saul e taigi David fu du fosi a kan kisi Saul en umapikin Mikal leki wefi? Fu san ede Saul e taigi David disi?
  • Te David e prei harpu gi Saul, dan san e pasa fu a di fu dri tron, soleki fa a prenki e sori?
  • Fa Mikal e yepi David fu tan na libi? Baka dati, san David musu du seibi yari langa?

Ete wan tu aksi