Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 58: David nanga Goliat

Tori 58: David nanga Goliat

DEN Filistiasma e kon baka fu feti nanga Israel. Den dri moro bigi brada fu David de na ini a legre fu Saul now. Fu dati ede Isai e taigi David wan dei: ’Tyari pikin tarwe nanga brede gi yu brada. Go luku fa a e go nanga den.’

Goliat

Te David doro na a legre kampu, dan a e lon go na a presi pe den e feti, fu suku en brada. A langa Filistiaman Goliat e kon na fesi fu spotu den Israelsma. A e du disi ala mamanten nanga ala neti sowan 40 dei kaba. A e bari tranga taki: ’Teki wan man na un mindri meki a kon feti nanga mi. Efu a wini èn kiri mi, dan wi sa de srafu fu unu, ma efu mi wini èn kiri en, dan unu sa de srafu fu wi. Mi e tyalensi unu fu teki wan man meki a kon feti nanga mi.’

David e aksi wan tu srudati: ’San a man sa kisi di e kiri a Filistiaman disi fu puru a syen disi gi Israel?’

’Saul sa gi en furu gudu’, a srudati e taki, ’èn a sa gi en na umapikin fu en leki wefi tu.’

Ma ala Israelsma e frede Goliat, bika a de so bigi. A langa sowan dri meter èn wan tra srudati e tyari a skelt fu en.

Wan tu srudati e go taigi Kownu Saul taki David wani feti nanga Goliat. Ma Saul e taigi David: ’Yu no o man feti nanga a Filistiaman disi. Yu na wan boi ete èn en na wan srudati en heri libi kaba.’ David e piki: ’Mi ben kiri wan beer nanga wan lew di ben tyari mi papa skapu gowe. Èn a Filistiaman disi sa tron leki wan fu den. Yehovah sa yepi mi.’ Dan Saul e taki: ’Go èn Yehovah musu de nanga yu.’

David e saka go na wan pikin kriki èn e feni feifi grati ston, di a e poti na ini en saka. Dan a e teki en slenger èn a e waka miti a langa man. Te Goliat e si en, a no kan bribi en ai. A e prakseri taki a de makriki fu kiri David.

David e fringi wan ston

’Waka kon miti mi nomo’, Goliat e taki. ’Mi sa gi den fowru nanga den busimeti yu skin fu nyan.’ Ma David e taki: ’Yu e waka kon miti mi nanga feti-owru, lansri, nanga peiri, ma mi e waka kon miti yu na ini a nen fu Yehovah. Tide Yehovah sa gi yu na ini mi anu èn mi sa naki yu trowe.’

Dan David e lon go miti Goliat. A e teki wan ston na ini en saka, a e poti en na ini en slenger èn a e fringi en nanga ala en krakti gowe. A ston e frei langalanga go na ini Goliat ede èn Goliat e fadon dede! Te den Filistijnsma e si taki a tranga man fu den dede, dan den alamala e lon gowe. Den Israelsma e lon na den baka èn e wini a feti.

1 Samuel 17:1-54.



Aksi

  • Fa Goliat e tyalensi a legre fu Israel?
  • O bigi Goliat de, èn san Kownu Saul e pramisi fu gi a man di e kiri Goliat?
  • San David e taki te Saul e taigi en taki a no kan go feti nanga Goliat fu di David na wan boi ete?
  • Fa David e sori nanga a fasi fa a e piki Goliat, taki a e frutrow tapu Yehovah?
  • Soleki fa yu kan si na tapu a prenki, dan san David e gebroiki fu kiri Goliat, èn san e pasa baka dati nanga den Filistiasma?

Ete wan tu aksi

Kon sabi moro

LERI DEN PIKIN FU YU

David no ben frede

Leisi a span Bijbel tori disi fu sabi fu san ede David ben abi deki-ati.