Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 52: Gideon nanga en 300 man

Tori 52: Gideon nanga en 300 man

YU E si san e pasa dya? Ala den man disi na fetiman fu Israel. Den man di beni, e dringi watra. A man di tanapu krosibei fu den na krutuman Gideon. A e luku fa den e dringi a watra.

Luku bun na den difrenti fasi fa den man e dringi. Sonwan e poti den fesi te na a watra. Ma wán e kisi a watra nanga en anu, so taki a kan si san e pasa lontu en. Disi de prenspari, bika Yehovah ben taigi Gideon fu teki soso den man di e tan luku aladi den e dringi. Gado e taki dati a musu seni den trawan go na oso. Meki wi luku fu san ede.

Agen den Israelsma de na ini problema, bika den no gi yesi na Yehovah. Den Midiansma kisi makti na den tapu èn e kwinsi den. Fu dati ede den Israelsma e bari kari Yehovah fu yepi den, èn Yehovah e arki a tranga kari fu den.

Yehovah e taigi Gideon fu seti wan legre; fu dati ede Gideon e tyari 32.000 fetiman kon makandra. Ma den feanti fu Israel abi wan legre fu 135.000 man. Èn toku Yehovah e taigi Gideon: ’Yu abi tumusi furu man.’ Fu san ede Yehovah ben taki dati?

We, efu Israel ben wini a feti, den ben sa kan denki taki nanga den eigi krakti den ben wini. Den ben sa kan denki taki den no abi a yepi fu Yehovah fanowdu fu wini. Dati meki Yehovah e taigi Gideon: ’Taigi ala den man di e frede, fu go na oso baka. Te Gideon e du disi, dan 22.000 fetiman e go na oso. Dati meki soso 10.000 man e tan abra fu feti nanga ala den 135.000 srudati dati.

Gideon e luku suma fu den man fu en a musu teki

Ma arki! Yehovah e taki: ’Toku yu abi tumusi furu man ete.’ Fu dati ede a e taigi Gideon fu meki den man dringi na a kriki disi èn dan fu seni ala den man go na oso di e poti den fesi te na a watra fu dringi. ’Mi sa meki yu wini a feti nanga den 300 man di ben e tan luku aladi den ben e dringi’, na so Yehovah e pramisi.

A ten fu a feti e doro. Gideon e prati en 300 man na ini dri grupu. A e gi ala man wan tutu, wan watrakan nanga wan frambo na ini a watrakan. Na wan pisi ten fu mindrineti, den e lontu a kampu fu a feanti. Dan na a srefi ten den alamala e bro na tapu den tutu, e naki den watrakan broko èn e bari tranga: ’A feti-owru fu Yehovah èn fu Gideon!’ Te den feanti e dyompo opo na sribi, dan den e bruya èn den e frede. Den alamala e bigin fu lon, èn den Israèlsma e wini a feti.

Krutuman kapitel 6 te nanga 8.



Aksi

  • Na ini sortu problema den Israelsma de? Fu san ede den de na ini bigi problema?
  • Fu san ede Yehovah e taigi Gideon taki a abi tumusi furu man na ini en legre?
  • Omeni man e tan abra baka te Gideon e taigi den man di frede, fu go baka na oso?
  • Fruteri nanga yepi fu a prenki fa Yehovah e saka a nomru fu fetiman na ini a legre fu Gideon teleki 300 man nomo e tan abra.
  • San Gideon e du fu sreka den 300 man fu en gi a feti, èn fa Israel e wini a feti?

Ete wan tu aksi