Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 50: Tu deki-ati uma

Tori 50: Tu deki-ati uma

TE DEN Israelsma e kon na ini problema, dan den e bari kari Yehovah. Yehovah e piki a begi fu den, fu di a e gi den deki-ati tiriman di e yepi den. Bijbel e kari den tiriman disi krutuman. Yosua ben de a fosi krutuman. Wan tu krutuman di ben kon baka en ben nen Otnièl, Ehud nanga Samgar. Ma tu fu den sma di e yepi Israel, na umasma di nen Debora nanga Yael.

Debora e taki nanga Barak

Debora na wan umaprofeiti. Yehovah e fruteri en san o pasa na ini a ten di de na fesi e kon èn dan a e fruteri a pipel san Yehovah taki. Debora na wan krutuman tu. A e sidon na ondro wan spesrutu palmbon na a bergikondre èn sma e kon nanga den problema na en fu a yepi den.

Na ini a ten dati, Yabin na a kownu fu Kanan. A abi 900 fetiwagi. En legre de so tranga, taki den e dwengi furu Israelsma fu tron futuboi fu Yabin. Na edeman fu a legre fu Yabin nen Sisera.

Wan dei Debora e seni kari krutuman Barak èn a e taigi en: ’Yehovah taki: "Teki 10.000 man go na a Tabor-bergi. Drape mi sa tyari Sisera kon na yu. Èn mi sa meki yu wini en nanga en legre.”’

Barak e taigi Debora: ’Mi sa go efu yu sa go tu nanga mi.’ Debora e go nanga en, ma a e taigi Barak: ’Yu no sa kisi a grani fu a wini, bika Yehovah sa gi Sisera na ini na anu fu wan umasma.’ Èn dati e pasa tu.

Barak e saka a Tabor-bergi go miti den srudati fu Sisera. Wantronso Yehovah e meki wan bigi frudu kon èn furu srudati fu a feanti e dede na watra. Ma Sisera e dyompo komoto na en wagi èn e lon gowe.

Barak, Yael nanga Sisera

Baka wan pisi ten Sisera e kon na a tenti fu Yael. Yael e kari en kon na inisei èn e gi en pikinso merki. Disi e meki sribi kiri en èn heri esi a e fadon na wan dipi sribi. Dan Yael e teki wan pen fu a tenti èn e naki dati go na ini na ede fu na ogriman disi. Bakaten, te Barak doro, dan Yael e sori en a dedeskin fu Sisera! Na so yu kan si, taki san Debora ben taki ben kon tru.

Te fu kaba den e kiri Kownu Yabin tu èn den Israelsma abi rostu fu wan pisi ten baka.

Krutuman 2:14-22; 4:1-24; 5:1-31.



Aksi

  • Suma na den krutuman, èn san na den nen fu wan tu fu den?
  • Sortu spesrutu grani Debora abi, èn sortu wroko a e du fu di a abi a grani disi?
  • Te Kownu Yabin nanga Sisera, a legre-edeman fu en, e pramisi fu du Israel ogri, dan sortu boskopu Yehovah e meki Debora gi Krutuman Barak? Suma sa kisi a grani soleki fa Debora taki?
  • Fa Yael e sori taki en na wan uma di abi deki-ati?
  • San e pasa baka te Kownu Yabin dede?

Ete wan tu aksi