Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 48: Den koni Gibeonsma

Tori 48: Den koni Gibeonsma

FURU fu den foto na Kanan e sreka now fu go feti nanga Israel. Den e denki taki den o man wini. Ma den sma fu a krosibei foto Gibeon e denki tra fasi. Den e bribi taki Gado e yepi den Israelsma èn den no wani feti nanga Gado. Yu sabi san den Gibeonsma e du fu dati ede?

Den e du neleki den e libi bun fara. Dati meki wan tu man e weri brokobroko krosi nanga owru susu. Den e lai den buriki fu den nanga owru saka èn e teki wan tu owru drei brede go nanga den. Dan den e go na Yosua èn den e taki: ’Wi komoto na wan bun fara kondre, bika wi ben yere fu a bigi Gado fu yu, Yehovah. Wi ben yere fu ala den sani di a ben du gi yu na Egepte. Fu dati ede den tiriman fu wi ben taigi wi fu sreka nyanyan èn kon na yu èn fu taki: "Wi na den futuboi fu yu. Pramisi wi taki yu no sa feti nanga wi.” Yu kan si taki wi krosi kon broko fu a langa pasi di wi waka èn taki wi brede kon owru èn drei.’

Yosua nanga den tra tiriman e bribi den Gibeonsma. Dati meki den e pramisi taki den no sa feti nanga den. Ma dri dei na baka den e kon sabi taki den Gibeonsma e libi bun krosibei.

’Fu san ede unu ben fruteri wi taki unu komoto na wan farawe kondre?’ Yosua e aksi den.

Den Gibeonsma e piki: ’Wi ben du dati, fu di sma ben fruteri wi taki a Gado fu yu, Yehovah, ben pramisi fu gi yu a heri kondre Kanan. Sobun wi ben frede taki yu ben sa kiri wi.’ Ma den Israelsma e hori densrefi na den wortu èn den no e kiri den Gibeonsma. Na presi fu dati, den e meki den tron den futuboi fu den.

A kownu fu Yerusalem ati e bron, fu di den Gibeonsma meki vrede nanga Israel. Fu dati ede a e taigi fo tra kownu: ’Kon yepi mi fu feti nanga Gibeon.’ Èn na dati na san den feifi kownu disi e du tu. A ben de wan koni sani fu a sei fu den Gibeonsma fu meki vrede nanga Israel, so taki den kownu disi e kon feti now nanga den? We, wi o si.

Yosua 9:1-27; 10:1-5

Yosua nanga den Gibeonsma


Aksi

  • Fa a pipel fu Gibeon e difrenti fu den sma fu Kanan di e libi na ini den krosibei foto?
  • Soleki fa a prenki e sori, dan san den Gibeonsma e du, èn fu san ede den e du dati?
  • San Yosua nanga den tra tiriman fu Israel e pramisi den Gibeonsma, ma san den e kon sabi baka dri dei?
  • San e pasa te kownu fu tra foto e yere taki den Gibeonsma meki vrede nanga Israel?

Ete wan tu aksi