Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 47: Wan fufuruman na ini Israel

Tori 47: Wan fufuruman na ini Israel
Akan e kibri den sani di a fufuru

LUKU san a man disi e beri na en tenti! Wan moi dyakti, wan pisi gowtu nanga wan tu solfru moni. A ben teki den na a foto Yerikow. Ma san den Israelsma ben musu du nanga den sani na Yerikow? Yu e memre dati ete?

Den ben musu pori den, èn a gowtu nanga a solfru den ben musu gi na a monikisi fu a tabernakel fu Yehovah. Sobun, den sma disi trangayesi Gado. Den fufuru san de fu Gado. A nen fu a man na Akan èn den sma di de nanga en na en osofamiri. Meki wi go luku san e pasa.

Baka di Akan fufuru den sani disi, dan Yosua e seni wan tu man fu feti nanga a foto Ai. Ma den ben lasi a feti. Sonwan e dede èn den trawan e lon gowe. Yosua e sari srefisrefi. A e didon nanga en fesi na gron èn e begi Yehovah: ’Fu san ede yu meki disi pasa nanga wi?’

Yehovah e piki: ’Opo! Israel sondu. Den teki wan tu sani di ben musu pori, noso di ben musu gi na a tabernakel. Den fufuru wan moi dyakti èn kibri en. Mi no sa blesi unu solanga unu no pori a dyakti èn kiri a sma di teki den sani disi.’ Yehovah e taki dati a sa sori Yosua suma na a ogriman.

Fu dati ede Yosua e kari a heri pipel kon makandra èn Yehovah e puru na ogriman Akan na den mindri. Akan e taki: ’Mi sondu. Mi ben si wan moi dyakti nanga a pisi gowtu nanga den solfru moni. Mi ben wani den so te. Fu dati ede mi teki den. Yu sa feni den beri na ini mi tenti.’

Te den sma feni den sani disi èn tyari den go na Yosua, dan Yosua e taigi Akan: ’Fu san ede yu tyari onkoloku kon na wi tapu? Now Yehovah sa tyari onkoloku kon na yu tapu!’ Dan ala den sma e ston Akan nanga en heri osofamiri kiri. Disi e sori taki noiti wi musu teki sani di no de fu wi, a no so?

Baka dati Israel e hari go feti baka nanga Ai. A leisi disi Yehovah e yepi en pipel èn den e wini a feti.

Yosua 7:1-26; 8:1-29.



Aksi

  • Suma na a man na tapu a prenki di e beri den gudu di a ben teki fu Yerikow? Suma na den sma di e yepi en?
  • Fu san ede a de so wan seryusu sani san Akan nanga en osofamiri du?
  • San Yehovah e taki te Yosua e aksi en fu san ede den Israelsma ben lasi a feti teige Ai?
  • San e pasa nanga Akan èn nanga en osofamiri baka di sma e tyari den kon na Yosua?
  • Sortu prenspari sani wi e leri fu a strafu di Akan kisi?

Ete wan tu aksi