Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 46: Den skotu fu Yerikow

Tori 46: Den skotu fu Yerikow

SAN meki den skotu disi fu Yerikow e fadon broko? A gersi neleki wan bigi bom kisi den. Ma na ini den dei dati den no ben abi bom ete; den no ben abi gon srefi ete. Disi na wan tra wondru fu Yehovah! Meki wi luku fa a ben pasa.

Den skotu fu Yerikow e fadon broko

Arki san Yehovah e taigi Yosua: ’Yu nanga den fetiman fu yu musu waka lontu a foto wán leisi wan dei, siksi dei langa. Tyari na ark fu a frubontu nanga unu. Seibi priester musu waka na fesi fu na ark èn bro na tapu den tutu fu den.

Na a di fu seibi dei un musu waka seibi leisi lontu a foto. Baka dati un musu bro tranga na tapu den tutu èn meki ala sma bari wan tranga feti babari. Dan den skotu sa fadon broko!’

Yosua nanga a pipel e du san Yehovah e taki. Aladi den e waka lontu, dan ala sma e tan pî. Nowan sma e taki wán wortu. Ala san sma e yere na a babari fu den tutu nanga den futu di e waka. Den feanti fu Gado pipel na Yerikow ben musu fu frede. Yu kan si a redi titei di e anga na a fensre? Suma abi a fensre dati? Iya, Rakab du san den spion ben taigi en. Ala en famiri de nanga en na ini na oso e wakti.

Yosua

Te fu kaba, na a di fu seibi dei, baka di den waka fu a di fu seibi leisi lontu a foto, dan den tutu e piki, den fetiman e bari, èn den skotu e fadon. Dan Yosua e taki: ’Kiri ala sma na ini a foto èn bron a foto. Bron ala sani. Kibri soso a solfru, a gowtu, a kopro nanga na isri èn gi dati na a monikisi fu a tenti fu Yehovah.’

Yosua e taigi den tu spion: ’Go na a oso fu Rakab, èn tyari en nanga ala en famiri kon na dorosei.’ Rakab nanga en famiri e tan na libi, neleki fa den spion ben pramisi en.

Yosua 6:1-25.



Aksi

  • San Yehovah e taigi den fetiman nanga den priester fu du siksi dei langa?
  • San den man musu du na tapu a di fu seibi dei?
  • Soleki fa yu kan si na tapu a prenki, dan san e pasa nanga den skotu fu Yerikow?
  • Fu san ede wan redi titei e anga na a fensre?
  • San Yosua e taigi den fetiman fu du nanga a pipel èn nanga a foto? Ma san musu pasa nanga a solfru, a gowtu, a kopro, nanga na isri?
  • San den tu spion musu du?

Ete wan tu aksi