Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 45: Den e koti Yordanliba abra

Tori 45: Den e koti Yordanliba abra

LUKU! den Israelsma e koti Yordanliba abra! Ma pe a watra de? Fu di furu alen e fadon na ini a pisi ten dati fu a yari, meki a liba ben furu srefisrefi nanga watra wan tu miniti pasa. Ma now ala watra gowe! Èn den Israelsma e koti abra na tapu drei gron, neleki fa den ben du na a Redi Se. Pe ala a watra go dan? Meki wi go luku.

Israelsma e koti a Redi Se abra

Di a ten ben doro gi den Israelsma fu koti Yordanliba abra, dan disi na san Yehovah ben meki Yosua taigi a pipel: ’Den priester musu teki na ark fu a frubontu èn waka go na wi fesi. Te den poti den futu na ini a watra fu Yordanliba, dan a watra sa tapu fu lon.’

Na so den priester e teki na ark fu a frubontu èn e tyari en na fesi a pipel. Te den e kon na a Yordan, dan den priester e waka langalanga go na ini a watra. A watra e lon bun tranga èn a dipi. Ma so esi leki den futu fu den miti a watra, a watra e bigin tapu fu lon! Na wan wondru! Oposei Yehovah tapu a watra hori. Dati meki heri esi watra no de moro na a liba!

Den priester di e tyari na ark fu a frubontu e waka langalanga go na a mindri fu a drei liba. Yu kan si den na tapu a prenki? Aladi den e tanapu drape, dan na tapu drei gron ala den Israelsma e koti Yordanliba abra!

Te ala sma waka abra, dan Yehovah e meki Yosua taigi 12 tranga man: ’Go na ini a liba na a presi pe den priester e tanapu nanga na ark fu a frubontu. Teki fu drape 12 ston, èn poti den na tapu makandra na a presi pe unu o tan dineti. Dan, bakaten, te un pikin sa aksi san den ston disi wani taki, un musu fruteri den taki a watra ben tapu fu lon, di Yehovah ark fu a frubontu ben koti a Yordan abra. Den ston sa memre unu na a wondru disi!’ Yosua e poti 12 ston sosrefi pe den priester ben tanapu na tapu a gron fu a liba.

Yosua

Te fu kaba Yosua e taigi den priester di e tyari na ark fu a frubontu: ’Waka komoto na a Yordan.’ So esi leki den du dati, a liba e bigin fu lon baka.

Yosua 3:1-17; 4:1-18.



Aksi

  • Sortu wondru Yehovah e du so taki den Israelsma man koti a Yordanliba abra?
  • San den Israelsma musu du fu sori taki den abi bribi, so taki den man koti a Yordanliba abra?
  • Fu san ede Yehovah e taigi Yosua fu teki 12 ston fu a liba?
  • San e pasa wantronso te den priester e komoto na ini a Yordanliba?

Ete wan tu aksi