Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 44: Rakab e kibri den spion

Tori 44: Rakab e kibri den spion

DEN man disi de na ini problema. Den musu lon gowe, noso sma o kiri den. Den na Israelsma di de spion èn na uma di e yepi den na Rakab. Rakab e libi dya na wan oso na tapu a skotu fu a foto Yerikow. Meki wi go luku fu san ede den man disi de na ini problema.

Den Israelsma de klari fu koti Yordanliba abra go na a kondre Kanan. Ma bifo den du dati, dan Yosua e seni den tu spion go. A e taigi den: ’Go luku fa a kondre nanga a foto Yerikow de.’

Rakab nanga tu spion fu Israel

Te den spion kon na Yerikow, den e go na a oso fu Rakab. Ma wan sma e taigi a kownu fu Yerikow: ’Tu Israelsma ben kon dya dineti fu luku a kondre na wan kibri fasi.’ Te a kownu e yere disi, a e seni man go na Rakab nanga a komando: ’Tyari den man di de na yu oso kon na doro!’ Ma Rakab kibri den spion na tapu en daki. Dati meki a e taki: ’Wan tu man ben kon trutru na mi oso, ma mi no sabi pe den ben komoto. Den gowe leti fa a ben bigin kon dungru, bifo a doro fu a foto ben tapu. Efu unu du esi, unu kan kisi den ete.’ Na so den man e hari go na den baka.

Baka di den gowe, dan Rakab e go esi-esi na a daki. ’Mi sabi taki Yehovah sa gi unu a kondre disi’, a e taigi den spion. ’Wi ben yere fa a ben meki a Redi Se kon drei, di unu ben e gowe libi Egepte, èn fa unu ben kiri den kownu Sihon nanga Og. Mi ben sori switifasi gi unu; fu dati ede pramisi mi, tangitangi, taki unu sa sori switifasi gi mi tu. Kibri a libi fu mi papa nanga mama nanga mi brada nanga sisa.’

Den spion e pramisi disi, ma Rakab musu du wan sani. ’Teki a redi titei disi èn tai en na yu fensre’, den spion e taki, ’èn tyari ala yu famiriman kon na yu oso. Èn te wi alamala kon fu teki Yerikow abra, dan wi sa si a titei disi na yu fensre èn wi no sa kiri nowan sma na yu oso.’ Te den spion e drai go baka na Yosua, den e fruteri en ala san ben pasa.

Yosua 2:1-24; Hebrewsma 11:31.



Aksi

  • Pe Rakab e libi?
  • Suma na den tu man na tapu a prenki, èn fu san ede den de na ini Yerikow?
  • Sortu komando a kownu fu Yerikow e gi Rakab, èn san Rakab e piki en?
  • Fa Rakab e yepi den tu man, èn san a e aksi den fu du gi en?
  • San den tu spion e pramisi Rakab?

Ete wan tu aksi