Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 43: Yosua e tron fesiman

Tori 43: Yosua e tron fesiman

MOSES wani so te fu go nanga den Israelsma na Kanan. Dati meki a e aksi: ’Tangitangi Yehovah, meki mi koti Yordanliba abra fu si a bun kondre.’ Ma Yehovah e taki: ’A nofo! No taki fu disi moro!’ Yu sabi fu san ede Yehovah ben taki dati?

Na fu san ben pasa di Moses ben naki a stonbergi. Soleki fa yu sabi, dan Moses nanga Aron no ben gi Yehovah grani. Den no ben taigi a pipel, taki na Yehovah ben o meki watra kon fu a stonbergi. Fu dati ede Yehovah ben taki dati a no ben o meki den go na Kanan.

Dati meki wan tu mun baka di Aron dede, Yehovah e taigi Moses: ’Teki Yosua, poti en tanapu na fesi a priester Eliasar èn na fesi a pipel. Fruteri drape pe ala sma de, taki Yosua na a nyun fesiman.’ Moses e du neleki fa Yehovah e taki, soleki fa yu kan si na tapu a prenki.

Moses e taki dati Yosua na a fesiman

Dan Yehovah e taigi Yosua: ’De tranga èn no frede. Na yu sa tyari den Israelsma go na a kondre Kanan, di mi pramisi den, èn mi sa de nanga yu.’

Bakaten Yehovah e taigi Moses fu kren go na a ede fu a Nebo-bergi na a kondre Moab. Komoto fu drape, Moses man luku abra Yordanliba go na a tumusi moi kondre Kanan. Yehovah e taki: ’Disi na a kondre di mi ben pramisi fu gi den pikin fu Abraham, Isak nanga Yakob. Mi meki yu si en, ma mi no sa meki yu go na ini.’

Drape na tapu na ede fu a Nebo-bergi Moses e dede. A ben abi 120 yari. A ben tranga ete èn den ai fu en ben bun ete. A pipel e sari srefisrefi. Den e krei fu di Moses dede. Ma den breiti fu abi Yosua leki a nyun fesiman fu den.

Numeri 27:12-23; Deuteronomium 3:23-29; 31:1-8, 14-23; 32:45-52; 34:1-12.



Aksi

  • Suma na den tu man na tapu a prenki di e tanapu nanga Moses?
  • San Yehovah e taigi Yosua?
  • Fu san ede Moses e kren go na a ede fu Nebo-bergi, èn san Yehovah e taigi en?
  • Omeni yari Moses ben abi di a dede?
  • Fu san ede a pipel e sari, ma fu san ede den kan breiti?

Ete wan tu aksi