Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 41: A kopro sneki

Tori 41: A kopro sneki
Moses nanga a kopro sneki

A SNEKI di lolo lontu a postu, no gersi wan trutruwan? Ma a no wan trutruwan. A meki fu kopro. Yehovah ben taigi Moses fu anga en na a postu, so taki a pipel ben man luku go na en èn tan na libi. Ma den tra sneki na gron na trutruwan. Den beti den sma èn meki den kon siki. Yu sabi fu san ede?

Na fu di den Israelsma taki kontrari Gado nanga Moses. Den e kragi: ’Fu san ede yu ben tyari wi komoto na Egepte fu dede na a sabana disi? Nyanyan nanga watra no de dya. Èn wi e tegu fu a mana disi.’

Ma a mana na bun nyanyan. Na wan wondru fasi Yehovah gi den a mana. Na wan wondru fasi a gi den watra tu. Ma den sma no de nanga tangi fu a fasi fa Gado ben sorgu gi den. Fu dati ede Yehovah e seni den ogri sneki disi fu strafu den Israelsma. Den sneki e beti den èn furu fu den e dede.

Sneki e beti den Israelsma

Te fu kaba, a pipel e kon na Moses èn e taki: ’Wi sondu, bika wi taki kontrari Yehovah nanga yu. Begi Yehovah now fu puru den sneki disi.’

Fu dati ede Moses e begi gi a pipel. Èn Yehovah e taigi Moses fu meki a kopro sneki disi. A e taki fu anga en na wan postu èn taki ala sma di den sneki beti musu luku go na a kopro sneki. Moses e du neleki fa Yehovah taki. Den sma di den sneki ben beti e luku go na a kopro sneki èn den e kon betre baka.

Wi kan leri wan sani fu a tori disi. Te yu luku en bun, dan wi alamala de leki den Israelsma dati di den sneki ben beti. Wi alamala na dedesma. Luku lontu, dan yu sa si taki sma e kon owru, e kon siki èn e dede. Disi du kon, fu di a fosi man nanga uma, Adam nanga Eva, ben drai baka gi Yehovah, èn wi alamala na pikin fu den. Ma Yehovah du wan sani, so taki wi man libi fu têgo.

Yehovah ben seni en Manpikin, Yesus Krestes, kon na grontapu. Den ben anga Yesus na wan postu, bika furu sma ben prakseri taki a ben ogri. Ma Yehovah ben seni Yesus kon fu puru wi na dede. Efu wi e luku go na en èn e waka na en baka, dan wi kan kisi têgo libi. Ma wi sa leri moro fu disi bakaten.

Numeri 21:4-9; Yohanes 3:14, 15.



Aksi

  • Soleki fa a prenki e sori, dan san na a sani di lolo lontu a postu? Fu san ede Yehovah ben taigi Moses fu poti a sani dati drape?
  • Fa a pipel e sori taki den no de nanga tangi gi ala den sani di Gado du gi den?
  • San a pipel e aksi Moses fu du baka te Yehovah e seni ogri sneki fu strafu den?
  • Fu san ede Yehovah e taigi Moses fu meki wan kopro sneki?
  • San wi kan leri fu a tori disi?

Ete wan tu aksi