LUKU den bromki nanga lepi amandra di e gro na a tiki disi. Disi na a tiki fu Aron. Den bromki nanga den lepi froktu disi ben gro na a tiki fu Aron na ini soso wán neti. Meki wi go luku fu san ede?

Moses e gi Aron a tiki di e gi bromki

Den Israelsma waka lontu fu wan pisi ten kaba na a sabana. Son sma no e agri taki Moses na fesiman, noso taki Aron musu de a granpriester. Korak na wan fu den di e denki so, sosrefi Datan, Abiram nanga 250 fesiman fu a pipel. Ala den sma disi e kon taigi Moses: ’Fu san ede yu e poti yusrefi na wi tapu?’

Moses e taigi Korak nanga en bakaman: ’Tamara mamanten un musu teki patu di e hori faya èn poti wierook na den ini. Dan kon na a tabernakel fu Yehovah. Wi sa si suma Yehovah o teki.’

A tamara fu en, Korak nanga en 250 bakaman e kon na a tabernakel. Furu trawan e kon tu fu horibaka gi den man disi. Yehovah ati e bron srefisrefi. ’Un komoto gowe na den tenti fu den ogri man disi’, Moses e taki. ’No fasi noti san de fu den.’ A pipel e arki, èn den e hari komoto na den tenti fu Korak, Datan, nanga Abiram.

Dan Moses e taki: ’Nanga disi unu sa sabi suma Yehovah teki. A gron sa priti opo, swari den ogri man disi.’

So esi leki Moses e kaba fu taki, a gron e priti opo. A tenti fu Korak nanga ala san a abi, makandra nanga Datan nanga Abiram nanga den sma di de nanga den, e saka gowe èn a gron e tapu ensrefi na den tapu. Te a pipel e yere a babari fu den sma di e saka gowe na ondro a gron, den e bari taki: ’Lon! Noso a gron kan swari wi tu!’

Korak nanga en 250 bakaman tanapu krosibei ete na a tabernakel. Fu dati ede Yehovah e seni faya bron den alamala. Dan Yehovah e taigi a manpikin fu Aron, Eliasar, fu teki den patu di ben hori faya èn di ben de fu den man di dede, èn meki wan fini plaat nanga den fu tapu a skin fu na altari. A plaat disi di de na a skin fu na altari, musu dini leki wan warskow gi den Israelsma, taki nowan sma boiti Aron nanga en manpikin mag dini leki priester gi Yehovah.

Ma Yehovah wani meki a kon moro krin, taki na Aron nanga den manpikin fu en a teki fu de priester. Fu dati ede a e taigi Moses: ’Meki wan fesiman fu ibri lo tyari en tiki kon. Meki Aron tyari en tiki kon gi a lo fu Leifi. Dan poti ala den tiki disi na ini a tabernakel na fesi na ark fu a frubontu. A tiki fu a man di mi teki leki priester sa gi bromki.’

Te Moses e go luku a tamara mamanten fu en, dan na a tiki fu Aron gi den bromki nanga den lepi amandra disi. We, yu e frustan now fu san ede Yehovah ben meki a tiki fu Aron gi bromki?

Numeri 16:1-49; 17:1-11; 26:10.



Aksi

  • Suma e opo densrefi teige a posisi fu Moses nanga Aron, èn san den sma dati e taigi Moses?
  • San Moses e taki dati Korak nanga den 250 bakaman man fu en musu du?
  • San Moses e taigi a pipel, èn san e pasa wantewante te a kaba taki?
  • San e pasa nanga Korak èn nanga den 250 bakaman fu en?
  • San Eleasar, a manpikin fu Aron, e du nanga den patu di ben hori faya èn di ben de fu den man di dede? Fu san ede a e du dati?
  • Fu san ede Yehovah e meki bromki gro na a tiki fu Aron? (Luku a prenki.)

Ete wan tu aksi