Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 38: Den 12 spion

Tori 38: Den 12 spion
Israel spion e tyari froktu

LUKU den froktu pikinso di den man disi e tyari. Luku fa a bosu droifi dati bigi. Tu man musu tyari en na wan tiki. Luku den figa nanga den granaki-apra. Pe den moi froktu disi komoto? Fu a kondre Kanan. Kanan na pe Abraham, Isak nanga Yakob ben libi wan dei. Ma fu a bigi angri di ben kon drape, meki Yakob nanga en famiri ben froisi go na Egepte. Now, sowan 216 yari na baka, Moses e tyari den Israelsma go baka na Kanan. Den kon na wan presi di nen Kades na ini sabana.

Ogrisma e libi na a kondre Kanan. Fu dati ede Moses e seni 12 spion go. A e taigi den: ’Luku omeni sma e libi drape èn o tranga den de. Luku tu efu a kondre bun fu prani sani. Èn sorgu taki un tyari wan tu froktu kon.’

Te den spion e drai kon baka na Kades, den e taigi Moses: ’A de wan bun kondre trutru.’ Èn fu buweisi dati, dan den e sori Moses wan tu fu den froktu. Ma tin fu den spion e taki: ’Den sma di e libi drape bigi èn tranga. Den sa kiri wi efu wi pruberi fu teki a kondre abra.’

Den Israelsma e kon frede te den yere disi. ’A moro betre wi ben dede na Egepte noso srefi dya na ini sabana’, den e taki. ’Wi sa dede na ini a feti èn den Kanansma sa kisi den uma nanga den pikin fu wi tyari gowe. Meki wi teki wan nyun fesiman èn drai go baka na Egepte!’

Ma tu fu den spion e frutrow tapu Yehovah. Den e pruberi fu kowru na ati fu a pipel. Den nen na Yosua nanga Kaleb. Den e taki: ’No frede. Yehovah de nanga wi. A sa de makriki fu teki a kondre abra.’ Ma a pipel no e arki. Den wani kiri Yosua nanga Kaleb srefi.

Disi e meki Yehovah ati kon bron srefisrefi. A e taigi Moses: ’Nowan sma fu a pipel di de 20 yari noso moro owru sa go na Kanan. Den si den wondru di mi ben du na Egepte èn na a sabana, ma toku den no e frutrow mi. Fu dati ede den sa waka lontu na ini a sabana 40 yari langa teleki a lastiwan dede. Soso Yosua nanga Kaleb sa go na a kondre Kanan.

Numeri 13:1-33; 14:1-38.



Aksi

  • San yu e feni aparti na a bosu droifi na tapu a prenki, èn fu pe a komoto?
  • Fu san ede Moses e seni 12 spion go na ini a kondre Kanan?
  • San tin spion e taigi Moses te den drai kon baka?
  • Fa tu spion e sori taki den e frutrow tapu Yehovah, èn fa den nen?
  • Fu san ede Yehovah e atibron, èn san a e taigi Moses?

Ete wan tu aksi