Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 37: Wan tenti gi na anbegi

Tori 37: Wan tenti gi na anbegi

YU SABI san na a sani disi? A de wan spesrutu tenti gi na anbegi fu Yehovah. A nen tabernakel tu. Den Israelsma ben bow en èn a ben kon klari wán yari baka di den ben gowe libi Egepte. Yu sabi suma ben kon nanga a prakseri fu bow en?

A tabernakel

A ben de Yehovah. Di Moses ben de na tapu a bergi, Yehovah ben taigi en fa a ben musu bow en. A ben musu meki en so, taki a ben kan lusu makriki. Na so fasi den ben kan tyari den pisi go na wan tra presi, èn poti en kon na wán baka drape. Sobun te den Israelsma ben froisi fu a wan presi go na a trawan na ini sabana, den ben tyari a tenti go nanga den.

Efu yu luku na inisei fu a pikin kamra na a kaba fu a tenti, dan yu e si wan kisi. Disi na a ark fu a frubontu. A ben abi tu engel noso syerub di ben de fu gowtu, na ibri sei wán. Gado ben skrifi den Tin Komando ete wan tron na tapu tu plata ston, bika Moses ben broko den fosiwan. Den ben kibri den ston disi na ini na ark fu a frubontu. Wan watrakan nanga mana ben de na ini tu. Yu kan memre ete san na mana?

Yehovah ben teki Moses brada Aron fu de granpriester. Na en ben e teki fesi gi a pipel na ini na anbegi fu Yehovah. Den manpikin fu en na priester tu.

Luku a moro bigi kamra fu a tenti now. A de tu tron so bigi leki a pikinwan. Yu e si a pikin kisi, pe smoko e komoto fu en go na loktu? Disi na a altari, pe den priester e bron switismeri sani di den e kari wierook. Wan kandratiki nanga seibi lampu de na ini a kamra disi. A di fu dri sani na ini a kamra na wan tafra. Na tapu a tafra yu abi 12 brede.

Na ini a dyari fu a tabernakel wan bigi patu noso beki de, di furu nanga watra. Den priester e gebroiki dati fu wasi. Wan bigi altari de drape tu. Dyaso den ben bron den meti di den ben kiri leki wan ofrandi gi Yehovah. A tenti de leti na mindri fu a kampu èn den Israelsma e libi lontu en na ini den tenti fu den.

Exodus 25:8-40; 26:1-37; 27:1-8; 28:1; 30:1-10, 17-21; 34:1, 2; Hebrewsma 9:1-5.



Aksi

  • San na a nen fu a tenti di de fu si na tapu a prenki, èn gi sortu sani den sma e gebroiki en?
  • Fu san ede Yehovah ben taigi Moses fu meki a tenti na so wan fasi taki a ben kan lusu makriki?
  • San na a kisi di de na ini a pikin kamra na a kaba fu a tenti, èn san de na ini a kisi?
  • Suma Yehovah e poti leki granpriester, èn san a granpriester musu du?
  • Kari den dri sani di de na ini a moro bigi kamra fu a tenti.
  • San na den tu sani di de na ini a dyari fu a tabernakel, èn gi sortu sani sma e gebroiki den?

Ete wan tu aksi