Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 36: A pikin kaw fu gowtu

Tori 36: A pikin kaw fu gowtu

SAN na disi? San den sma e du drape now? Den e anbegi wan pikin kaw! Fu san ede den e du dati?

Te Moses e tan langa na tapu a bergi, dan den sma e taki: ’Wi no sabi san pasa nanga Moses. Fu dati ede, meki wi meki wan gado fu tyari wi komoto na a kondre disi.’

Moses e iti den tu plata ston trowe na gron

’A bun’, Moses brada Aron e taki. ’Puru un gowtu yesilinga tyari kon na mi.’ Te a pipel du disi, dan Aron e smèlter den kon tron wan pikin kaw fu gowtu. A pipel e taki now: ’Disi na wi Gado, di ben tyari wi komoto na Egepte!’ Dan den e hori wan bigi fesa, den e anbegi a pikin kaw fu gowtu.

Te Yehovah e si disi, en ati e bron tumusi. Fu dati ede a e taigi Moses: ’Go esi-esi na gron. A pipel e du wan bun ogri sani. Den frigiti mi wet, den e boigi gi wan pikin kaw fu gowtu.’

Sma e anbegi wan pikin kaw fu gowtu

Moses e saka a bergi esi-esi. Te a kon moro krosibei, a e si fa a pipel e singi, e dansi lontu a pikin kaw fu gowtu! Moses ati e bron so te, taki a e iti den tu plata ston trowe di abi den wet na tapu, so taki den e broko na pisipisi. Dan a e teki a pikin kaw fu gowtu èn a e smèlter en. Dan a e masi en tron puiri.

A pipel du wan tumusi ogri sani. Dati meki Moses e taigi wan tu fu den man fu teki den feti-owru. ’Den ogri sma di ben anbegi a pikin kaw fu gowtu musu dede’, Moses e taki. Na so den man e naki 3000 sma kiri! Disi e sori fa wi musu luku bun fu dini Yehovah wawan, èn fu no dini nowan enkri falsi gado, a no so?

Exodus 32:1-35.



Aksi

  • San a pipel na tapu a prenki e du, èn fu san ede?
  • Fu san ede Yehovah e atibron? San Moses e du te a e si san a pipel e du?
  • San Moses e taigi wan tu man fu du?
  • San wi musu leri fu a tori disi?

Ete wan tu aksi