Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 35: Yehovah e gi den wet fu en

Tori 35: Yehovah e gi den wet fu en

WAN tu mun so, baka di den Israelsma gowe libi Egepte, dan den e doro na a Sinaibergi, di sma e kari Horeb tu. Disi na a srefi presi pe Yehovah ben taki nanga Moses komoto fu a busibusi di ben e bron. A pipel e opo den tenti dyaso fu tan wan pisi ten.

Aladi a pipel e wakti na gron, dan Moses e kren go na tapu a bergi. Drape na tapu na ede fu a bergi, Yehovah e taigi Moses taki a wani den Israelsma fu gi en yesi èn tron en spesrutu pipel. Te Moses e kon na gron, a e fruteri den Israelsma san Yehovah ben taki. A pipel e taki dati den wani gi Yehovah yesi, bika den wani de en pipel.

Yehovah e du wan aparti sani now. A e meki smoko komoto na a ede fu a bergi, èn a e meki dondru bari tranga. Sosrefi a e taki nanga a pipel: ’Mi na Yehovah, un Gado, di ben tyari unu komoto na Egepte.’ Dan a e komanderi den: ’Un musu dini mi wawan èn nowan enkri tra gado.’

Tu plata ston

Gado e gi den Israelsma ete neigi tra komando noso wet. A pipel e frede tumusi. Den e taigi Moses: ’Na yu musu taki nanga wi, bika wi e frede taki wi sa dede efu Gado e taki nanga wi.’

Bakaten Yehovah e taigi Moses: ’Kon na mi na tapu a bergi. Mi sa gi yu tu plata ston, pe mi ben skrifi den wet na tapu, di mi wani fu a pipel hori.’ Fu dati ede Moses e go agen na tapu a bergi. A e tan 40 dei nanga 40 neti drape.

Gado abi bun furu wet gi en pipel. Moses e skrifi den wet disi poti na buku. Gado e gi Moses den tu plata ston sosrefi. Na tapu den disi, Gado srefi skrifi den tin wet di a ben meki a heri pipel kon sabi. Den e kari den: den Tin Komando.

Moses na tapu a Sinaibergi

Den Tin Komando na prenspari wet. Ma na so den furu tra wet, di Gado e gi den Israelsma, de prenspari tu. Wan fu den wet disi e taki: ’Yu musu lobi Yehovah yu Gado nanga yu heri ati, yu heri frustan, yu heri sili nanga yu heri krakti.’ Wan tra wet e taki: ’Yu musu lobi tra sma leki fa yu lobi yusrefi.’ A Manpikin fu Gado, Yesus Krestes, ben taki dati den wet disi na den tu moro bigi wet di Yehovah ben gi en pipel Israel. Bakaten wi sa leri furu sani di e taki fu a Manpikin fu Gado nanga den leri fu en.

Exodus 19:1-25; 20:1-21; 24:12-18; 31:18; Deuteronomium 6:4-6; Levitikus 19:18; Mateyus 22:36-40.



Aksi

  • Pe den Israelsma opo den tenti, tu mun baka di den gowe libi Egepte?
  • San Yehovah wani taki a pipel musu du, èn san den e piki?
  • Fu san ede Yehovah e gi Moses tu plata ston?
  • Sortu tra wet Yehovah ben gi den Israelsma boiti den Tin Komando?
  • Sortu tu wet na den moro bigi wet soleki fa Yesus ben taki?

Ete wan tu aksi