Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 32: Den 10 plaag

Tori 32: Den 10 plaag

LUKU den prenki pikinso. Ibriwan e sori wan plaag di Yehovah ben tyari kon na tapu Egepte. Na tapu a fosi prenki yu e si fa Aron e naki nanga en tiki na tapu Nijl-liba. Di a ben du dati, dan a watra fu a liba ben tron brudu. Den fisi ben dede, èn a liba ben bigin tingi.

Plaag na tapu den Egeptesma

Baka dati, dan Yehovah ben meki todo komoto kon na Nijl-liba. Den ben de alape: na den onfu, na den bakapan, na den sma bedi — alape. Di den todo ben dede, den Egeptesma ben hari den poti na ipi. Den dede todo disi ben meki a kondre kon tingi.

Dan Aron naki nanga en tiki na tapu a gron, èn a fugufugu santi ben tron mampira. Disi na pikin freifrei di e beti. Den mampira na a di fu dri plaag di kon na tapu Egepte.

Den tra plaag ben du soso den Egeptesma ogri, no den Israelsma. A di fu fo plaag ben de wan plaag fu bigi freifrei di ben frei na bosu go na ini den oso fu ala den Egeptesma. A di fu feifi plaag ben kon na tapu den meti. Furu fu den kaw, nanga skapu nanga bokoboko fu den Egeptesma ben dede.

Baka dati, dan Moses nanga Aron ben teki pikinso asisi èn ben iti dati na loktu. Disi ben meki takru sweri opo na a skin fu libisma nanga meti. Disi ben de a di fu siksi plaag.

Moro fara, Moses ben opo en anu go na loktu, ne Yehovah ben seni dondru èn a ben meki pisipisi ijs fadon komoto fu hemel leki wan bigi alen. Noiti ete so furu pisipisi ijs ben fadon kon na ini Egepte.

A di fu aiti plaag ben de wan bigi ipi sprenka. Na fesi fu dati èn na baka fu dati, noiti someni sprenka ben de. Den ben nyan ala sani di na alen fu pisipisi ijs no ben pori.

A di fu neigi plaag ben de dungru. Dri dei langa a kondre ben dungru pikapika, ma pe den Israelsma ben e libi, leti ben de.

Te fu kaba, dan Gado ben taigi en pipel fu iti-iti a brudu fu wan yongu bokoboko noso fu wan yongu skapu na tapu den doropostu fu den. Ne na engel fu Yehovah ben hari pasa Egepte. Te na engel ben si a brudu, a no ben kiri nowan sma na a oso dati. Ma na ala den oso pe brudu no ben de na tapu den doropostu, na engel fu Gado ben kiri den fosi geborewan fu libisma nanga meti. Disi ben de a di fu tin plaag.

Baka a lasti plaag disi, dan Farao ben taigi den Israelsma fu gowe. A pipel fu Gado ben de srekasreka fu gowe. A srefi neti dati den ben bigin hari komoto na Egepte.

Exodus kapitel 7 te 12.



Aksi

  • Gebroiki den prenki dyaso fu fruteri san na den fosi dri plaag di Yehovah ben tyari kon tapu Egepte.
  • San ben de a difrenti na mindri den fosi dri plaag nanga den tra plaag?
  • San ben de a di fu fo, a di fu feifi, nanga a di fu siksi plaag?
  • Fruteri san ben pasa na a di fu seibi, a di fu aiti, nanga a di fu neigi plaag.
  • San Yehovah ben taigi den Israelsma fu du bifo a di fu tin plaag kon?
  • San ben de a di fu tin plaag, èn san ben pasa baka dati?

Ete wan tu aksi