Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 30: A busibusi di ben e bron

Tori 30: A busibusi di ben e bron

MOSES ben doro te na a Horeb-bergi fu suku grasi gi en skapu. Dyaso a ben si wan busibusi de na ini faya, ma a no ben e bron.

Moses na a busibusi di e bron

’Disi na wan aparti sani’, Moses ben prakseri. ’Mi sa go moro krosibei fu luku en moro bun.’ Di a ben du dati, ne a yere wan sten na ini a busibusi e taki: ’No kon moro krosibei! Puru yu susu, bika yu e tanapu na tapu santa gron.’ A ben de Gado di ben e taki nanga mofo fu wan engel. Fu dati ede Moses ben tapu en fesi.

Ne Gado ben taki: ’Mi ben si a pina fu mi pipel na Egepte. Fu dati ede mi o go fri den, ma yu na a sma di mi e seni go fu tyari mi pipel komoto na Egepte.’ Yehovah ben o tyari en pipel go na a tumusi moi kondre Kanan.

Ma Moses ben taki: ’Mi no de noti. Fa mi o man fu du disi? Ma kon mi taki mi go, ma den Israelsma sa taigi mi: "Suma seni yu kon?”, dan san mi musu taki?’

’Disi na san yu musu taki’, Gado ben piki. ’"YEHOVAH, a Gado fu Abraham, a Gado fu Isak, a Gado fu Yakob, ben seni mi kon.” ’ Yehovah ben taki moro fara: ’Disi na mi nen fu têgo.’

’Ma kon mi taki den no bribi dati yu ben seni mi kon’, Moses e piki.

’San de na yu anu?’ Gado ben aksi.

Moses ben piki: ’Wan tiki.’

’Trowe en na gron’, Gado ben taki. Di Moses ben du dati, a tiki ben tron wan sneki. Ne Yehovah ben sori Moses wan tra wondru. A ben taki: ’Trusu yu anu go na ini yu dyakti.’ Moses ben du dati, ma di a hari en anu puru, a ben weti fan! Na anu ben gersi leki a ben kisi a takru siki di nen gwasi. Now Yehovah ben gi Moses a makti fu du wan di fu dri wondru. Te fu kaba a ben taki: ’Te yu du den wondru disi, dan den Israelsma sa bribi taki na mi ben seni yu kon.’

Baka dati Moses ben go na oso, a ben taigi Yeitrow: ’Grantangi, meki mi drai go baka na mi famiri na Egepte fu si fa den tan.’ Na so Yeitrow taki Moses adyosi. Ne Moses ben teki pasi go baka na Egepte.

Exodus 3:1-22; 4:1-20.



Aksi

  • San na a nen fu a bergi di de na tapu a prenki?
  • Fruteri sortu aparti sani Moses ben si di a go na a bergi nanga en skapu.
  • San wan sten na ini a busibusi ben taki, èn fu suma a sten dati ben de?
  • San Moses ben piki di Gado taigi en taki a ben o tyari a pipel fu Gado komoto na Egepte?
  • San Gado ben taigi Moses fu taki, efu a pipel ben o aksi en suma seni en kon?
  • Fa Moses ben o man buweisi taki na Gado seni en kon?

Ete wan tu aksi