Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 27: Na ogri kownu fu Egepte

Tori 27: Na ogri kownu fu Egepte

DEN man dya e dwengi den sma fu wroko. Luku a man di e wipi wan fu den wrokoman! Den wrokoman de fu a famiri fu Yakob. Den e kari den Israelsma. Den sma di e dwengi den fu wroko na Egeptesma. Den Israelsma tron srafu fu den Egeptesma. Fa disi ben pasa?

Egeptesma e dwengi den Israelsma fu wroko

A bigi famiri fu Yakob ben libi furu yari na ini vrede na Egepte. Yosef ben sorgu gi den, di a ben de baka Farao a moro prenspari man na Egepte. Ma dan Yosef ben dede. Ne wan nyun Farao ben tron kownu fu Egepte. A no ben lobi den Israelsma.

Na ogri Farao disi ben meki den Israelsma tron srafu. A ben poti ogri nanga takru-ati man na den tapu. Den ben dwengi den Israelsma fu wroko bun tranga fu bow foto gi Farao. Ma toku den Israelsma ben tan kon moro furu. Te fu kaba, den Egeptesma ben kon frede taki den Israelsma ben sa kon tumusi furu èn tumusi tranga.

Egeptesma e dwengi den Israelsma fu wroko

Yu sabi san Farao ben du? A ben taki nanga den uma di ben yepi den Israel mama te den ben e meki den beibi fu den. A ben taki: ’Un musu kiri ala den boi di den mama e meki.’ Ma den uma disi ben de bun uma. Den no ben kiri den beibi.

Fu dati ede Farao ben komanderi en heri pipel: ’Kiri ala beibi fu Israel di de wan boi. Meki soso den umapikin tan na libi.’ Dati ben de wan ogri-ati komando, a no so? Meki wi go luku now fa wan fu den boi ben tan na libi.

Exodus 1:6-22.



Aksi

  • Suma na a man nanga a wipi na tapu a prenki, èn suma a e fon?
  • San ben pasa nanga den Israelsma baka di Yosef dede?
  • Fu san ede meki den Egeptesma ben kon frede den Israelsma?
  • Sortu komando Farao ben gi den uma di ben yepi den Israel uma te den ben e meki pikin?

Ete wan tu aksi