Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 26: Yob e tan getrow na Gado

Tori 26: Yob e tan getrow na Gado

YU E sari a sikiman disi? A nen Yob. Na uma na en wefi. Yu sabi san a e taigi Yob? ’Fluku Gado èn dede!’ Meki wi go luku pikinso fu san ede a e taki dati, èn fu san ede Yob ben nyan someni pina.

Yob nanga butsweri

Yob ben de wan getrow man di ben gi yesi na Yehovah. A ben libi na a kondre Us, no fara fu Kanan. Yehovah ben lobi Yob srefisrefi, ma wan tra sma ben de di no ben man si Yob na ai. Yu sabi suma?

Dati ben de Satan Didibri. Yu sabi ete taki Satan na a ogri engel di no man si Yehovah na ai. A ben man fu meki Adam nanga Eva trangayesi Yehovah. A ben prakseri taki a ben man meki ala tra sma trangayesi Yehovah tu. Ma a ben man fu du dati? Nôno. Prakseri nomo den getrow man nanga uma di wi ben leri fu den. Fu omeni fu den yu sabi a nen?

Baka di Yakob nanga Yosef dede na Egepte, dan na heri grontapu nowan sma ben de so getrow na Yehovah leki Yob. Yehovah ben wani meki Satan kon sabi, taki Satan no ben man meki ala sma kon ogri. Fu dati ede Yehovah ben taki: ’Luku Yob pikinso. Luku fa a de getrow na mi.’

’A de getrow’, Satan ben piki, ’fu di yu e blesi en, èn fu di a abi furu bun sani. Ma efu yu teki den sani disi puru na en, dan a sa fluku yu.’

Fu dati ede Yehovah ben taki: ’A bun. Teki ala sani puru na Yob. Du ala den ogri sani di yu wani du nanga en. Ma yu no mag kiri en.’

Na a fosi presi, Satan ben meki sma fufuru ala kaw nanga kameili fu Yob. A ben meki sma kiri ala Yob skapu. Dan a kiri den tin manpikin nanga umapikin fu Yob na ini wan bigi winti. Baka dati, Satan ben naki Yob nanga a takru siki disi. Yob ben nyan pina tumusi. Dati meki en uma ben taigi en: ’Fluku Gado èn dede!’ Ma Yob no ben du dati. Sosrefi, dri falsi mati ben kon taigi en taki a ben libi wan takru libi. Ma Yob ben tan getrow.

Disi ben prisiri Yehovah srefisrefi èn bakaten a ben blesi Yob, soleki fa yu kan si na tapu a prenki. A ben meki a kon betre. Yob ben kisi tin moro moi pikin baka, tu tron someni kaw nanga skapu nanga kameili leki a ben abi na fesi.

Yu sa de getrow na Yehovah ala ten neleki Yob? Efu yu sa de getrow, dan Gado sa blesi yu tu. Yu sa man fu libi fu têgo, te heri grontapu sa meki kon moi neleki a dyari fu Eden.

Yob 1:1-22; 2:1-13; 42:10-17.

Yob nanga en osofamiri


Aksi

  • Suma ben de Yob?
  • San Satan ben pruberi fu du, ma sani ben pasa soleki fa a ben wani?
  • San Yehovah ben gi Satan primisi fu du, èn fu san ede?
  • Fu san ede a wefi fu Yob ben taigi en fu ’fluku Gado èn dede’? (Luku a prenki.)
  • Soleki fa yu e si na tapu a tra prenki, dan fa Yehovah ben blesi Yob, èn fu san ede?
  • Efu wi de getrow na Yehovah neleki Yob, dan sortu blesi wi sa kisi?

Ete wan tu aksi