Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 23: Den dren fu Farao

Tori 23: Den dren fu Farao

TU YARI e pasa, ma Yosef de na dungru-oso ete. A man di e kanti win gi kownu frigiti en. Dan, wan neti Farao e kisi tu spesrutu dren. A e aksi ensrefi san den dren wani taki. Yu e si fa a e sribi drape? A tamara mamanten a e kari den koni man fu en kon, a e fruteri den san a dren. Ma den no man fu fruteri en san den dren wani taki.

Now fosi a man di e kanti win gi a kownu e memre Yosef. A e taigi Farao: ’Di mi ben de na dungru-oso, wan man ben de drape di ben man fu puru dren.’ Farao e meki den puru Yosef wantewante na dungru-oso.

Farao e fruteri Yosef den dren fu en: ’Mi ben si seibi fatu kaw di ben moi. Dan mi ben si seibi bun mangri kaw. Den mangriwan ben nyan den fatuwan.

Farao e dren

Na a di fu tu dren fu mi, mi ben si seibi taki nanga lepi tarwe di ben span. Den ben e gro na wán tiki. Dan mi ben si seibi fini, dreidrei taki nanga tarwe. Den fini taki nanga tarwe ben bigin fu swari den seibi bun taki nanga tarwe.’

Yosef e taigi Farao: ’Den tu dren wani taki a srefi. Den seibi fatu kaw èn den seibi span taki nanga tarwe wani taki seibi yari. Èn den seibi mangri kaw èn den seibi fini taki nanga tarwe wani taki ete seibi yari. Seibi yari sa kon pe furu nyanyan sa gro na Egepte. Dan seibi yari sa kon pe tumusi pikinso nyanyan sa gro.’

Dati meki Yosef e taigi Farao: ’Suku wan koni man, meki a tyari nyanyan kon makandra na ini den seibi bun yari, dan a pipel no sa dede fu angri na ini den seibi takru yari pe pikinso nyanyan sa gro.’

Farao e feni a prakseri disi wan bunwan. A e gi Yosef a wroko fu tyari a nyanyan kon makandra na ini maksin. Na so Yosef e tron baka Farao a moro prenspari man fu Egepte.

Aiti yari baka dati, na a ten fu na angri, Yosef e si wan tu man e kon. Yu sabi suma na den? We, na den tin bigi brada fu Yosef! Den papa Yakob seni den go na Egepte, bika nyanyan e kon kaba na Kanan. Yosef e kon sabi taki na en brada, ma en brada no man sabi en. Yu sabi fu san ede? Bika Yosef ben kon moro bigi, a ben weri tra sortu krosi tu.

Yosef e memre taki di a ben de wan boi, a ben dren taki en brada ben e kon boigi gi en. Yu e memre ete taki wi ben leisi fu dati kaba? Now Yosef e frustan taki Gado ben seni en go na Egepte fu bun ede. San yu prakseri Yosef sa du now? Meki wi go luku.

Genesis 41:1-57; 42:1-8; 50:20.



Aksi

  • San e pasa nanga Farao wan neti?
  • Fa a du kon taki now fosi a man di e kanti win gi Farao e memre Yosef?
  • Soleki fa a prenki e sori, dan san na den tu dren di Farao abi?
  • San den dren wani taki, soleki fa Yosef e sori?
  • Fa a du kon taki Yosef e tron a moro prenspari man baka Farao na ini Egepte?
  • Fu san ede den brada fu Yosef e kon na Egepte, èn fu san ede den no sabi taki na en?
  • Sortu dren Yosef e memre baka, èn san disi e meki en frustan?

Ete wan tu aksi

  • Leisi Genesis 41:1-57.

    Fa Yosef ben meki sma poti prakseri na Yehovah, èn na sortu fasi Kresten na ini a ten disi kan teki na eksempre fu en? (Gen. 41:162528; Mat. 5:16; 1 Petr. 2:12)

    Den yari di furu nyanyan ben de na ini Egepte èn den yari fu angriten di ben kon baka dati, e sori krin fa a yeye situwâsi fu Yehovah en pipel na ini a ten disi e difrenti fu a di fu Krestenhèit. Fa so? (Gen. 41:29, 30; Amos 8:11, 12)

  • Leisi Genesis 42:1-8 nanga 50:20.

    Efu a de a gwenti na ini wan kondre fu boigi fesi wan sma fu sori lespeki gi a posisi fu en, dan a de wan fowtu sani te anbegiman fu Yehovah e du dati? (Gen. 42:6)