Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 22: Den poti Yosef na ini dungru-oso

Tori 22: Den poti Yosef na ini dungru-oso

YOSEF abi 17 yari nomo te den e tyari en go na Egepte. Drape den e seri en gi wan man di nen Potifar. Potifar e wroko gi a kownu fu Egepte di den e kari Farao.

Yosef na ini dungru-oso

Yosef e wroko tranga gi en meester. Now, di Yosef kon moro bigi, dan Potifar e gi en a frantwortu fu luku en heri oso. Ma fu san ede Yosef de dya na dungru-oso? Dati kon fu Potifar wefi.

Yosef gro kon tron wan man di moi srefisrefi. Fu dati ede Potifar wefi wani taki a kon didon na en. Ma Yosef sabi taki disi na wan fowtu sani èn a no wani fu du dati. Potifar wefi ati e bron tumusi. Te en masra e kon na oso, a e lei gi Yosef. A e taki: ’Yosef ben pruberi fu kon didon na mi!’ Potifar e bribi en wefi. En ati e bron srefisrefi nanga Yosef. A e meki den poti en na dungru-oso.

A man di abi a frantwortu fu a dungru-oso e si heri esi taki Yosef na wan bun sma. Fu dati ede a e gi en a frantwortu fu luku ala den strafuman. Bakaten, Farao ati e kon bron nanga a man di e kanti win gi en, sosrefi nanga a bakriman fu en. A e poti den na dungru-oso. Wan neti den ala tu e kisi wan spesrutu dren, ma den no sabi san den dren wani taki. A tamara fu en Yosef e taki: ’Fruteri mi a dren fu unu.’ Dati den e du. Dan nanga a yepi fu Gado a e puru san den dren wani taki kon na krin.

A e taigi a man di ben kanti win gi a kownu: ’Fosi dri dei den sa lusu yu, yu sa kanti win baka gi Farao.’ A e taki moro fara: ’Te yu kon fri, fruteri Farao fu mi, so taki mi komoto dya.’ Gi a bakriman a e taki: ’Fosi dri dei Farao sa meki den koti yu ede puru.’

Fosi dri dei a e pasa soleki fa Yosef ben taki. Farao e meki den koti na ede fu a bakriman puru. Ma a man di e kanti win gi Farao e komoto trutru na dungru-oso. A e bigin fu dini a kownu baka. Ma a e frigiti Yosef krinkrin! A no e fruteri Farao noti fu en. Na so Yosef musu tan na dungru-oso.

Genesis 39:1-23; 40:1-23.



Aksi

  • Omeni yari Yosef abi te den e tyari en go na Egepte, èn san e pasa te a doro drape?
  • Fa a du kon taki Yosef de na ini dungru-oso?
  • Sortu frantwortu Yosef e kisi na ini a dungru-oso?
  • Te Yosef de na ini dungru-oso, dan san a e du gi a bakriman fu Farao èn gi a man di e kanti win gi Farao?
  • San e pasa baka te a man di e kanti win gi Farao e komoto na dungru-oso?

Ete wan tu aksi