Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 20: Dina e kon na ini problema

Tori 20: Dina e kon na ini problema

YU E si suma Dina e go fisiti dya? A e go na wan tu umapikin di e libi na Kanan. En papa Yakob ben sa feni disi bun? Fu piki na aksi disi, pruberi fu memre san Abraham nanga Isak ben denki fu den uma fu Kanan.

Dina e go na den umapikin fu Kanan

Abraham ben wani fu en manpikin Isak trow nanga wan umapikin fu Kanan? Nôno. Isak nanga Rebeka ben wani fu den manpikin Yakob trow nanga wan umapikin fu Kanan? Nôno. Yu sabi fu san ede?

Bika Kanansma ben anbegi falsi gado. Den no ben de bun sma fu trow nanga den, noso fu abi den leki mati. Fu dati ede wi kan de seiker, taki Yakob no ben sa prisiri fu en umapikin ben go meki mati nanga den umapikin fu Kanan.

Èn fu tru, Dina ben kon na ini problema. Yu e si na tapu a prenki a Kanan-man di e luku Dina? En nen na Sikem. Wan dei di Dina ben kon na fisiti, dan Sikem ben grabu Dina hori, dwengi Dina fu go didon na en. Dati ben de wan fowtu sani, bika soso man nanga uma di trow mag didon na makandra. A takru sani disi, di Sikem ben du nanga Dina, ben tyari moro problema kon.

Di den brada fu Dina ben yere san ben pasa, den ati ben bron srefisrefi. Tu fu den, Simeon nanga Leifi ati ben bron so te, taki den grabu den feti-owru, hari go na a foto, ne den ròs den man. Makandra nanga den brada fu den, den ben kiri Sikem nanga ala den tra man. Yakob ati ben bron tumusi fu na ogridu disi fu en manpikin.

Ma fa ala den problema disi ben bigin? Fu di Dina ben meki mati nanga sma di no ben gi yesi na den wet fu Gado. Wi no sa wani fu abi den sortu mati disi, a no so?

Genesis 34:1-31.



Aksi

  • Fu san ede Abraham nanga Isak no ben wani taki den pikin fu den trow nanga sma fu a kondre Kanan?
  • Yakob ben feni en bun taki en umapikin ben meki mati nanga den umapikin fu Kanan?
  • Suma na a man na tapu a prenki di e luku Dina, èn sortu ogri sani a man disi ben du?
  • San Simeon nanga Leifi, den brada fu Dina, du di den yere san ben pasa?
  • Yakob ben feni a sani bun di Simeon nanga Leifi ben du?
  • Fa ala den problema na ini na osofamiri ben bigin?

Ete wan tu aksi

  • Leisi Genesis 34:1-31.

    Na wán leisi nomo Dina ben abi demakandra nanga den umapikin fu Kanan? Tyari disi kon na krin. (Gen. 34:1)

    Fu san ede Dina ben de frantwortu sosrefi fu a lasi di a lasi en nyunwenke-fasi? (Gal. 6:7)

    Fa yonguwan na ini a ten disi kan sori taki den teki a warskow di de fu feni na ini a tori fu Dina? (Odo 13:20; 1 Kor. 15:33; 1 Yoh. 5:19)