Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 16: Isak e kisi wan bun wefi

Tori 16: Isak e kisi wan bun wefi

YU SABI suma na a uma na tapu a prenki disi? A nen Rebeka. A man di a e waka go miti nen Isak. A o tron en wefi. Fa disi ben pasa?

We, Isak papa, Abraham, ben wani en manpikin kisi wan bun wefi. A no ben wani fu Isak trow nanga wan fu den uma fu Kanan, bika den sma disi ben e anbegi falsi gado. Fu dati ede Abraham ben taigi en futuboi: ’Mi wani fu yu go na Haran pe mi famiri e libi fu suku wan uma gi mi manpikin Isak.’

Wantewante Abraham futuboi ben teki tin kameili, a ben bigin waka a langa pasi. Di a ben doro na a presi pe Abraham famiri ben e libi, a ben tapu na wan peti. A ben de lati bakadina, na a ten di den uma fu a foto ben gwenti fu kon kisi watra na a peti. Now Abraham futuboi ben begi Yehovah: ’Meki na uma, di kisi pikin watra gi mi nanga den kameili, de na uma di yu ben teki gi Isak.’

Rebeka e miti Isak

No langa baka dati Rebeka ben kon fu kisi watra. Di a futuboi ben aksi en pikin watra, a ben gi en. Dan a ben go kisi nofo watra gi ala den kameili di watra ben kiri. Dati ben de wan hebi wroko, bika kameili e dringi bun furu watra.

Di Rebeka ben klari, dan Abraham futuboi ben aksi en fa en papa nen. A ben aksi tu efu a ben kan tan sribi na a oso fu den. Rebeka ben taki: ’Mi papa na Betuel, wi abi nofo presi gi yu.’ Abraham futuboi ben sabi taki Betuel ben de a manpikin fu Abraham brada Nahor. Fu dati ede a ben kindi, a ben taki Yehovah tangi, taki a ben tyari en go na den famiri fu Abraham.

A neti dati Abraham futuboi ben fruteri Betuel nanga Rebeka brada Laban fu san ede a ben kon. Den ala tu ben feni en bun taki Rebeka ben kan go nanga en fu trow nanga Isak. Di den ben aksi Rebeka efu a ben wani go, a ben taki: ’Iya.’ Sobun a tamara fu en den kren na tapu den kameili, den ben bigin waka a langa pasi go baka na Kanan.

Di den ben doro, a ben de neti. Rebeka ben si wan man e waka na ini a gron. A ben de Isak. A ben breiti fu si Rebeka. Isak mama, Sara, ben dede dri yari pasa kaba, èn Isak ben e sari ete fu disi. Ma now a ben kon lobi Rebeka srefisrefi, a ben kon de koloku baka.

Genesis 24:1-67.



Aksi

  • Suma na a man nanga na uma na tapu a prenki?
  • San Abraham ben du fu feni wan wefi gi en manpikin, èn fu san ede a ben du dati?
  • Fa a futuboi fu Abraham ben kisi piki tapu a begi fu en?
  • San Rebeka piki di den aksi en efu a ben wani trow nanga Isak?
  • San meki taki Isak ben de koloku baka?

Ete wan tu aksi

Kon sabi moro

LERI DEN PIKIN FU YU

Rebeka ben wani prisiri Yehovah

San wi kan du fu de leki Rebeka? Leisi a tori èn sabi suma na en.