Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 14: Gado e tesi Abraham bribi

Tori 14: Gado e tesi Abraham bribi

YU E si san Abraham e du dya? A abi wan nefi, a luku leki a o kiri en manpikin. Ma fu san ede? Meki wi go luku fosi fa Abraham nanga Sara ben kisi a manpikin fu den.

Abraham e gi Isak leki ofrandi

Soleki fa yu sabi, dan Gado ben pramisi den wan manpikin. Ma dati ben gersi wan sani di no ben kan pasa noiti, fu di Abraham nanga Sara ben de so owru kaba. Ma Abraham ben bribi taki Gado ben man du san ben gersi leki a no ben kan pasa noiti. Sobun, san ben pasa?

Wan heri yari ben pasa, baka di Gado ben gi en pramisi. Ne di Abraham ben de 100 yari èn Sara 90 yari, dan den kisi wan manpikin, di den ben kari Isak. Gado ben hori en pramisi!

Ma di Isak ben kon moro bigi, dan Yehovah ben tesi a bribi fu Abraham. A ben bari: ’Abraham!’ Abraham ben piki: ’Dya mi de!’ Ne Gado ben taki: ’Teki yu wan-enkri manpikin, Isak, èn go na wan bergi di mi sa sori yu. Drape yu musu kiri yu manpikin èn gi en leki wan ofrandi.’

Den wortu disi ben meki Abraham sari tumusi, bika a ben lobi en manpikin srefisrefi. Soleki fa yu sabi, dan Gado ben pramisi en taki den pikin fu en ben sa libi na a kondre Kanan. Ma fa dati ben sa man pasa efu Isak ben dede? Abraham no ben frustan a tori, ma toku a ben gi yesi na Gado.

Di Abraham ben doro na tapu a bergi, a ben tai Isak èn ben poti en na tapu na altari di a ben meki. Dan a ben teki a nefi fu kiri en manpikin. Ma leti na a yuruten dati, na engel fu Gado ben bari: ’Abraham, Abraham!’ Èn Abraham ben piki: ’Dya mi de!’

’No du a boi ogri’, Gado ben taki. ’Now mi sabi taki yu e bribi mi, bika yu no ben hori yu manpikin, yu wan-enkriwan, fu gi mi en.’

Abraham ben abi wan tranga bribi na ini Yehovah Gado srefisrefi! A ben bribi taki sani no ben de di Yehovah no man du, iya, taki Yehovah ben man opo Isak srefi na dede. Ma Gado no ben wani trutru taki Abraham ben sa kiri Isak. Fu dati ede a ben meki wan skapu tan fasi na ini wan busibusi di ben de krosibei. A ben taigi Abraham fu gi dati leki ofrandi na presi fu en manpikin.

Genesis 21:1-7; 22:1-18.



Aksi

  • San Gado ben pramisi Abraham, èn san Gado du fu meki a pramisi kon tru?
  • Soleki fa a prenki e sori, dan fa Gado ben tesi a bribi fu Abraham?
  • San Abraham du, aladi a no ben frustan fu san ede Gado ben gi en so wan komando?
  • San ben pasa di Abraham teki a nefi fu kiri en manpikin?
  • O tranga Abraham ben bribi na ini Gado?
  • San Gado ben poti gi Abraham fu gi leki ofrandi, èn fa Gado ben du dati?

Ete wan tu aksi