Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 9: Noa e bow wan ark

Tori 9: Noa e bow wan ark
Sma e lafu Noa

NOA ben abi wan wefi nanga dri manpikin. Den nen fu en manpikin ben de Sem, Kam nanga Yafet. Ibriwan fu den ben abi wan wefi. Sobun, na osofamiri fu Noa ben abi aiti sma.

Now Gado ben meki Noa du wan aparti sani. A ben taigi en fu bow wan bigi ark. Na ark disi ben bigi leki wan sipi, ma a ben gersi wan bigi langa kisi. ’Meki en dri sodro hei’, Gado ben taki, ’èn meki kamra na ini’. Den kamra ben de gi Noa nanga en osofamiri, gi den meti, èn gi a nyanyan di den alamala ben o abi fanowdu.

Gado ben taigi Noa tu fu meki na ark so, taki watra no ben kan pasa go na ini. Gado ben taki: ’Mi o tyari wan bigi frudu fu watra kon fu pori heri grontapu. Ala sma di no de na ini na ark sa dede.’

Noa nanga en manpikin ben gi yesi na Yehovah èn ben bigin fu bow. Ma den tra sma ben lafu den. Den sma dati ben tan du ogri sani. Nowan sma ben bribi Noa di a ben fruteri den san Gado ben o du.

Noa en famiri e tyari meti nanga nyanyan go na ini na ark

A ben teki langa fu bow so wan bigi ark. Baka furu yari, a ben kon klari. Now Gado ben taigi Noa fu tyari den meti go na ini na ark. Gado ben taki fu tyari tu fu son sortu go na inisei, wan manwan nanga wan umawan. Ma fu tra sortu a ben musu tyari seibi go na inisei. Gado ben taigi Noa tu fu tyari ala den difrenti sortu fowru go na inisei. Noa ben du fa Gado ben taigi en.

Te fu kaba, Noa nanga en osofamiri ben go na ini na ark tu. Ne Gado ben tapu a doro. Noa nanga en osofamiri ben e wakti na inisei now. Kon wi taki, dati yu tu ben de nanga den na ini na ark e wakti. Wan frudu sa kon trutru leki fa Gado ben taki?

Genesis 6:9-22; 7:1-9.



Aksi

  • Omeni sma ben de na ini na osofamiri fu Noa, èn fa den dri manpikin fu en ben nen?
  • Sortu aparti sani Gado aksi Noa fu du, èn fu san ede?
  • San den birtisma fu Noa ben du di a fruteri den fu na ark?
  • San Gado ben taigi Noa fu du nanga den meti?
  • Baka di Gado tapu a doro fu na ark, dan san Noa nanga en osofamiri ben abi fu du?

Ete wan tu aksi

  • Leisi Genesis 6:9-22.

    San meki taki Noa ben de wan tumusi bun anbegiman fu a tru Gado? (Gen. 6:922)

    Fa Yehovah e feni en te sma e handri na wan ogri-ati fasi nanga trawan? Fa disi musu abi krakti tapu den sani di wi e du, di wi e luku, noso di wi e arki na ini wi prisiriten? (Gen. 6:11, 12; Ps. 11:5)

    Fa wi kan de leki Noa te wi e kisi rai nanga yepi fu Yehovah en organisâsi? (Gen. 6:22; 1 Yoh. 5:3)

  • Leisi Genesis 7:1-9.

    Yehovah ben si Noa, wan man di no ben de volmaakti, leki wan regtfardikisma. Fa a sani dati e gi wi deki-ati na ini a ten disi? (Gen. 7:1; Odo 10:16; Yes. 26:7)