Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 8: Langa sma na grontapu

Tori 8: Langa sma na grontapu

SAN yu ben o prakseri efu wan sma di ben hei leki a sodro fu yu oso ben o waka miti yu? A sma dati ben sa de wan langa sma! Wan ten ben de pe langa sma ben de na grontapu trutru. Bijbel e sori taki den papa fu den ben de engel. Ma fa dati ben kan?

Langa sma di e du ogri

Prakseri pikinso, taki na ogri engel Satan ben e du ala sani fu tyari problema kon. A ben e pruberi srefi fu meki den engel fu Gado kon ogri. Baka wan pisi ten, dan sonwan fu den engel disi ben bigin arki Satan. Den ben tapu nanga a wroko di Gado ben gi den fu du na hemel. Den ben kon na grontapu èn ben meki libisma skin gi densrefi. Yu sabi fu san ede?

Bijbel e taki, dati den manpikin disi fu Gado ben si den moi uma na grontapu èn ben wani fu libi nanga den. Fu dati ede den ben kon na grontapu èn ben trow nanga den uma disi. Bijbel e taki, dati disi no ben bun, bika Gado ben meki den engel fu libi na hemel.

Di den engel nanga den uma fu den ben kisi beibi, dan den beibi disi ben de tra fasi. Biginbigin kande den no ben luku tumusi tra fasi. Ma den ben kon bigi moro nanga moro èn ben kon tranga moro nanga moro, teleki den ben tron langa sma.

Den langa sma disi ben ogri. Èn fu di den ben de so bigi èn tranga meki den ben e du sma ogri. Den ben pruberi fu dwengi ala sma fu kon ogri neleki den.

Heinok ben dede, ma wan man ben de now na grontapu di ben de wan bun man. A man disi ben nen Noa. Ala ten a ben du san Gado ben wani fu a du.

Wan dei Gado ben taigi Noa, taki a ten ben doro fu wai ala ogrisma puru. Ma Gado ben o kibri Noa, en osofamiri èn furu fu den meti. Meki wi go luku fa Gado ben du disi.

Genesis 6:1-8; Yudas 6.



Aksi

  • San ben pasa di sonwan fu den engel fu Gado arki Satan?
  • Fu san ede sonwan fu den engel tapu nanga a wroko fu den na ini hemel fu kon na grontapu?
  • Fu san ede a ben de wan fowtu sani taki den engel ben kon na grontapu èn taki den ben meki libisma skin gi densrefi?
  • Fa den pikin fu den engel ben de tra fasi leki tra pikin?
  • Soleki fa yu kan si na tapu a prenki, dan san den pikin fu den engel ben e du di den tron langa bigi-skin sma?
  • Baka di Heinok dede, dan sortu bun man ben libi na grontapu, èn fu san ede Gado ben lobi en?

Ete wan tu aksi