Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 7: Wan deki-ati man

Tori 7: Wan deki-ati man
Heinok

DI MORO nanga moro sma ben kon na grontapu, dan moro furu fu den ben du ogri sani neleki Kain. Ma wan man ben de di ben de tra fasi. A de a man disi di ben nen Heinok. Heinok ben de wan deki-ati man. Aladi den sma, di ben de lontu en, ben e du ogri sani, toku Heinok ben tan dini Gado.

Yu sabi fu san ede den sma na a ten dati ben du someni ogri sani? We, go prakseri pikinso, suma ben meki Adam nanga Eva trangayesi Gado èn nyan fu a froktu di Gado ben taki den no musu nyan? Iya, dati ben de wan ogri engel. Bijbel e kari en Satan. Na en e pruberi fu meki ibri sma kon ogri.

A fufuru den sma sani èn a kiri a man

Wan dei Yehovah Gado ben meki Heinok fruteri den sma wan sani di den no ben wani yere. A ben de a sani disi: ’Wan dei Gado o kiri ala ogrisma.’ Kande den sma ati ben bron srefisrefi di den ben yere disi. Kande den ben pruberi fu kiri Heinok srefi. Dati meki a ben musu abi deki-ati srefisrefi fu fruteri den sma san Gado ben o du.

Gado no ben meki Heinok libi langa na mindri den ogri sma dati. Heinok ben libi 365 yari nomo. Fu san ede wi e taki "365 yari nomo”? Bika den sma na ini a ten dati ben moro tranga leki now. Den ben e libi moro langa. A manpikin fu Heinok, Metusala, ben kon abi 969 yari!

Sma e du ogri sani

Den sma ben kon ogri moro nanga moro, baka di Heinok dede. Bijbel e taki dati den ’ben prakseri soso ogri sani’ èn dati ’grontapu ben kon furu nanga ogridu’.

Yu sabi fu san ede someni ogri ben de na grontapu na ini den dei dati? Fu di Satan ben feni wan nyun fasi fu meki den sma du ogri sani. Wi o leri fu disi na ini san e kon now.

Genesis 5:21-2427; 6:5; Hebrewsma 11:5; Yudas 14, 15.



Aksi

  • Fa Heinok de difrenti fu tra sma?
  • Fu san ede den sma na ini a ten fu Heinok ben e du someni ogri sani?
  • Sortu ogri sani den sma ben e du? (Luku a prenki.)
  • Fu san ede Heinok ben musu abi deki-ati?
  • O langa den libisma na ini a ten dati ben e libi, ma o langa Heinok libi?
  • San ben pasa baka di Heinok dede?

Ete wan tu aksi

  • Leisi Genesis 5:21-2427.

    Fa a banti ben de na mindri Heinok nanga Yehovah? (Gen. 5:24)

    Soleki fa Bijbel e sori, dan suma ben de a moro owru man di oiti ben libi, èn omeni yari a ben abi di a dede? (Gen. 5:27)

  • Leisi Genesis 6:5.

    O takru a situwâsi ben kon de na grontapu baka di Heinok dede, èn fa dati gersi a ten fu wi? (2 Tim. 3:13)

  • Leisi Hebrewsma 11:5.

    Sortu fasi fu Heinok "ben plisi Gado”, èn san ben de a bakapisi fu dati? (Gen. 5:22)

  • Leisi Yudas 14, 15.

    Fa Kresten na ini a ten disi kan sori a srefi deki-ati leki Heinok te den e warskow sma fu a feti fu Armagedon di o kon? (2 Tim. 4:2; Hebr. 13:6)