Go na content

Go na a tra menu

Go na table of contents

Yehovah Kotoigi

Sranantongo

Mi buku nanga Bijbel tori

Tori 116: Fa wi kan libi fu têgo

Tori 116: Fa wi kan libi fu têgo

YU KAN fruteri san a yongu umapikin nanga en mati e leisi? Iya, na a srefi buku di yu e leisi now — Mi buku nanga Bijbel tori. Èn den e leisi a srefi tori leki yu: "Fa wi kan libi fu têgo.”

Wan boi e leisi

Yu sabi san den e leri fu dati? Na a fosi presi, taki wi musu leri furu fu Yehovah nanga en Manpikin Yesus, efu wi wani libi fu têgo. Bijbel e taki: ’Fu kan libi fu têgo, yu musu leri furu fu a wan-enkri tru Gado nanga en Manpikin di a ben seni kon na grontapu, Yesus Krestes.’

Fa wi kan leri furu fu Yehovah Gado nanga en Manpikin Yesus? Wan fu den fasi de, te yu e leisi Mi buku nanga Bijbel tori fu a bigin te na a kaba. A buku e fruteri furu fu Yehovah nanga Yesus, a no so? A e fruteri furu fu den sani di den du èn den sani di den o du ete. Ma wi musu du moro leki soso fu leisi a buku disi.

Bijbel

Yu e si a tra buku di de na gron? Dati na Bijbel. Meki wan sma leisi den pisi fu Bijbel gi yu, fu pe den tori fu a buku disi teki puru. Bijbel e fruteri wi ala san wi musu sabi fu dini Yehovah na wan yoisti fasi èn fu kisi têgo libi. Sobun, wi musu meki en wan gwenti fu studeri Bijbel furu tron.

Ma soso fu leri furu fu Yehovah Gado nanga Yesus Krestes, no nofo. Wi ben sa kan abi bun furu sabi fu Yehovah nanga Yesus nanga san den ben leri sma èn toku no kisi têgo libi. Yu sabi san wi musu du moro ete?

Wi musu du sosrefi san wi e leri. Yu e memre Yudas Iskariot ete? A ben de wan fu den 12 man di Yesus ben teki leki en apostel. Yudas ben sabi furu fu Yehovah nanga Yesus. Ma san ben pasa nanga en? Baka wan pisi ten a ben go prakseri ensrefi nomo èn a ben tori Yesus gi en feanti fu 30 solfru moni. Dati meki Yudas no sa kisi têgo libi.

Yu e memre Gehasi ete, a man di wi ben leri fu en na ini Tori 69? A ben wani wan tu krosi nanga moni di no ben de fu en. Dati meki a ben meki wan lei fu kisi den sani disi. Ma Yehovah ben strafu en. Èn a sa strafu wi tu efu wi no e gi yesi na den wet fu en.

Ma furu sma ben de tu, di ben dini Yehovah getrow. Wi wani de leki den, a no so? A pikin boi Samuel na wan bun eksempre gi wi. Yu e memre ete san wi ben leisi na Tori 55, taki a ben abi soso fo noso feifi yari di a ben bigin fu dini Yehovah na a tabernakel. Sobun, a no abi trobi o yongu yu de, yu no de tumusi yongu fu dini Yehovah.

A no de fu taki, dati a sma di wi alamala wani waka na en baka, na Yesus Krestes. Srefi di a ben de wan pikin boi, soleki fa wi ben si na Tori 87, a ben de kaba na ini a tempel èn a ben taki nanga tra sma fu en hemel Tata. Meki wi waka baka na eksempre fu en. Meki wi fruteri someni sma leki wi kan fu wi wondru Gado Yehovah nanga en Manpikin Yesus Krestes. Efu wi du den sani disi, dan wi sa man libi fu têgo na ini Gado nyun paradijs na grontapu.

Yohanes 17:3; Psalm 145:1-21.



Aksi

  • San wi musu sabi fu man libi fu têgo?
  • Fa wi kan kon sabi moro fu Yehovah Gado nanga Yesus, soleki fa a yongu umapikin nanga den mati fu en e du na tapu a prenki?
  • Sortu tra buku yu e si na tapu a prenki, èn fu san ede wi musu leisi a buku dati furu tron?
  • Boiti taki wi musu kon sabi sani fu Yehovah nanga Yesus, dan san moro de fanowdu fu man kisi têgo libi?
  • San wi kan leri fu Tori 69?
  • San a bun eksempre fu a pikin boi Samuel na ini Tori 55 e sori?
  • Fa wi kan waka baka na eksempre fu Yesus Krestes? Efu wi e du dati, dan san wi sa man du na ini a ten di e kon?

Ete wan tu aksi