Go na content

Go na a tra menu

Go na table of contents

Yehovah Kotoigi

Sranantongo

Piki tapu 10 aksi di yongusma abi

 AKSI 1

Suma na mi?

Suma na mi?

FU SAN EDE A BUN FU TAKI FU DISI?

Te yu sabi yusrefi èn yu sabi san yu e bribi, dan dati o yepi yu fu sabi san yu o du te sma wani dwengi yu fu du wan sani.

SAN YU BEN O DU?

Luku a tori disi: Na nètnèt Chantal doro na wan fesa te a e yere wan sma di a sabi e taki:

„Hey Chantal, yu de dyaso tu?”

Chantal e drai luku èn a e si taki na en mati Jessica. A e hori tu batra biri na ini en anu. Jessica e langa wan fu den batra gi Chantal, dan a e taigi en: „Meisje, dringi pikinso, ko’w meki prisiri. Yu bigi kaba, tòg?”

Yu kan si taki Chantal no wani, ma Jessica na en mati. A no wani meki en mati denki taki a e du leki wan oma. Èn Jessica na wan bun pikin. Dus efu en e dringi, dan a no kan de fout. Chantal e taki na ensrefi: ’Na wan biri nomo. A no drugs mi o teki.’

Efu yu ben de Chantal, san yu ben o du?

DENKI A TORI!

Efu yu wani sabi san yu ben o du te so wan sani miti yu, dan yu musu sabi yusrefi. Dus yu musu kon sabi san yu wani èn san yu e bribi. Te yu sabi disi, dan tra pikin no o man kon taigi yu fa yu musu libi. Yusrefi o bepaal dati.1 Korentesma 9:26, 27.

San kan yepi yu fu kon sabi yusrefi bun? Den fo aksi di e kon now, kan yepi yu.

 1 SAN MI MAN DU BUN?

Te yu sabi san yu man du bun èn sortu moi fasi yu abi, dan yu o de moro seiker fu yusrefi.

BIJBEL EKSEMPRE: Na apostel Paulus ben skrifi: „Awinsi mi no man taki so bun, toku mi no e mankeri sabi” (2 Korentesma 11:6). Fu di Paulus ben frustan Bijbel bun, meki a no ben e broko en ede tumusi nanga san sma ben e denki fu en. Te den ben e taki sani fu en, dan a no ben e meki a sani dati broko en saka.2 Korentesma 10:10; 11:5.

KON SABI SUMA NA YU: Skrifi sortu sani yu lobi du noso sortu sani yu man du heri bun.

Skrifi sortu moi fasi yu abi (Yu lobi tra sma? Yu lobi gi sma sani? Sma kan frutrow yu? Yu na wan sma di no lobi kon lati?)

2 NANGA SORTU SANI MI E FETI?

Wan oso kan moi, ma efu a fondamenti fu en swaki, dan a heri oso kan fadon broko. Na so a de tu taki yu kan abi moi fasi. Ma efu wan sani de pe yu swaki èn yu no e meki muiti fu feti nanga en, dan a kan pori yu heri libi.

BIJBEL EKSEMPRE: Paulus ben sabi nanga sortu sani a ben musu feti. A ben skrifi: ’Na ini mi ati mi e prisiri trutru nanga a wet fu Gado, ma mi e si taki wan tra wet de na ini mi skin, èn a e feti nanga a wet fu mi frustan. A wet dati e basi mi.’Romesma 7:22, 23.

KON SABI SUMA NA YU: Nanga sortu sani yu musu tan feti?

 3 SAN MI WANI DU NANGA MI LIBI?

Yu ben o teki wan taxi, dan yu taigi a taximan fu a rèi lontu teleki en wagi lon drei? Dati ben o de wan don sani èn na fu soso yu ben o pai someni moni.

San disi e leri yu? Te yu sabi san yu wani du nanga yu libi, dan yu no o de leki wan sma di e rèi lontu nomo. Yu o sabi pe yu e go èn fa yu o doro drape.

BIJBEL EKSEMPRE: Paulus ben skrifi: „Mi no e lon bruyabruya” (1 Korentesma 9:26). Sobun, Paulus ben sabi san a ben wani èn a ben e meki muiti fu kisi den sani dati.Filipisma 3:12-14.

KON SABI SUMA NA YU: Skrifi sortu dri sani yu wani du na ini wán yari.

4 FA YU E DENKI FU SANI?

Te yu sabi yusrefi, dan yu o de leki wan bon di rutu dipi èn di tranga winti no o man wai trowe

Efu yu no sabi fa yu e denki fu sani, yu no o man sabi san yu musu du. Yu o de leki wan agama di e kenki kleur ala leisi baka. Yu o du sani nomo fu di yu wani taki tra pikin lobi yu. Disi ben o sori taki yu no sabi yusrefi.

Ma te yu e sori krin fa yu e denki, dan awinsi san trawan e du, yu o man sori krin suma na yu.

BIJBEL EKSEMPRE: Di a profeiti Danièl ben de wan yongu boi, a „ben teki a bosroiti” kaba taki a no ben o trangayesi Gado, awinsi en famiri no ben de nanga en (Danièl 1:8). Na so a ben sori suma na en. Danièl ben sori krin fa a ben e denki.

KON SABI SUMA NA YU: Fa yu e denki fu sani? Yu e bribi na ini Gado? Efu dati de so, dan fu san ede yu e bribi na ini en? San meki yu e bribi taki a de trutru?

Yu e bribi taki den wet fu Gado bun gi yu? Efu dati de so, dan fu san ede yu e bribi dati?

Leki san yu wani de: Leki wan blad di fadon komoto fu wan bon èn di ibri pikin winti e wai go pe a wani, noso leki wan bon di e tan tanapu, awinsi sortu tranga winti e wai? Te yu leri sabi yusrefi, dan yu o de leki a bon dati. Disi o yepi yu fu piki na aksi: Suma na mi?