Go na content

Go na a tra menu

Go na table of contents

Yehovah Kotoigi

Sranantongo

Piki tapu 10 aksi di yongusma abi

 AKSI 4

San mi kan du te mi meki wan fout?

San mi kan du te mi meki wan fout?

FU SAN EDE A BUN FU TAKI FU DISI?

Te yu no e frede fu taki sortu fout yu meki, dan yu e sori taki yu koni èn sma o frutrow yu.

SAN YU BEN O DU?

Luku a tori disi: Tim e prei bal nanga den mati fu en, dan a e fringi a bal naki a grasi fu a wagi fu en buurman broko.

Efu yu ben de Tim, san yu ben o du?

DENKI A TORI!

YU KAN DU DRI SANI:

  1. Lon.

  2. Gi wan tra sma a fout.

  3. Fruteri buurman san pasa èn taigi en taki yu o pai gi a grasi.

Kande a fosi sani di yu ben o wani du, na fu lon. Ma a moro bun fu taki san yu du, awinsi na wan grasi fu wan wagi yu broko noso yu du wan tra sani.

 FU SAN EDE A BUN FU TAKI SAN YU DU?

  1. Na a moro bun sani fu du.

    Bijbel e taki: „Wi wani du ala sani nanga wan krin ati.”Hebrewsma 13:18.

  2. Te yu meki wan fout èn yu taigi sma taki na yu du en, dan den o wani gi yu pardon.

    Bijbel e taki: „Sani no o waka bun gi a sma di e kibri den sondu fu en, ma sma o sori sari-ati gi wan sma te a e taki krin sortu sondu a du èn te a no e du den moro.”Odo 28:13.

  3. San moro prenspari na taki Gado e breiti.

    Bijbel e taki: „Yehovah e tegu gi sma di e bedrigi trawan, ma a de bun mati nanga den sma di ati krin.”Odo 3:32.

Karina di abi 20 yari, kisi wan butu fu di a rèi tranga. Ma noiti a no taigi en papa. Karina e taki: „Baka wán yari, mi papa kon sabi a tori fu di a feni a papira. A sani disi meki mi papa ati bron srefisrefi.”

San Karina leri fu a tori disi? A e taki: „Te yu pruberi fu kibri wan fout di yu meki, a probleem e kon moro bigi. Bakaten yu o firi en.”

SAN YU KAN LERI FU WAN FOUT DI YU MEKI?

Bijbel e taki: „Wi alamala e sondu furu tron” (Yakobus 3:2). Dus wi e meki fout. Ma te dati pasa èn yu e taki wantewante san yu du, dan yu e sori taki yu abi sakafasi èn taki yu koni.

Leri wan sani tu fu den fout di yu meki. Wan meisje di nen Vera e taki: „Mi e pruberi fu leri wan sani fu ibri fout di mi meki. Disi e yepi mi fu tron wan moro bun sma èn fu du sani tra fasi te mi meki wan fout baka.” Meki wi go luku fa yu kan du a srefi.

Yu leni yu brada baisigri èn yu broko wan sani na en. San yu ben o du?

  • No taki noti èn howpu taki yu brada no si en.

  • Taigi yu brada san pasa.

  • Taigi yu brada, ma dan yu e gi wan tra sma a fout.

Yu no wroko bun gi wan repetitie noso wan exame, fu di yu no stuka. San yu ben o du?

  • Taki dati a ben muilek tumusi.

  • Taki dati na fu di yu no stuka, meki yu no wroko bun.

  • Taki dati na a meneer no lobi yu.

Te yu e tan prakseri wan fout di yu meki, dan a de neleki te yu ben o rèi wan wagi èn yu e tan luku na ini a spikri go na baka

 Luku den tori disi baka. Kon meki wi taki dati yu na (1) yu brada noso (2) a meneer. San yu brada ben o du te yu taigi en san pasa? San a meneer ben o du? San den ben o denki fu yu efu yu ben o pruberi fu kibri a fout di yu meki?

Prakseri now sortu fout yu meki a yari di pasa, dan pruberi fu piki den aksi disi.

San na a fout? San yu du di yu meki a fout?

  • Mi no fruteri san mi du.

  • Mi gi wan tra sma a fout.

  • Mi taki dati na mi meki a fout.

Kon meki wi taki dati yu no ben taki san yu du. Fa yu ben firi bakaten?

  • Mi ben breiti, fu di sma no ben sabi.

  • Mi konsensi ben fon mi, fu di mi kibri a tori.

Fa yu ben kan du en moro bun?

San yu leri fu den fout di yu meki?

SAN YU E DENKI?

Fu san ede son sma e frede fu taki dati na den meki a fout?

Fa sma o si yu efu ala yuru yu e pruberi fu kibri den fout fu yu. Ma fa den o denki fu yu te yu e taki san yu du?Lukas 16:10.