Go na content

Go na table of contents

Yehovah Kotoigi

Tongo Sranantongo

 AKSI 7

San mi kan du te wan sma aksi mi fu abi seks nanga en?

San mi kan du te wan sma aksi mi fu abi seks nanga en?

FU SAN EDE A BUN FU TAKI FU DISI?

A fasi fa yu e denki fu seks èn den sani di yu e du, kan kenki yu heri libi.

SAN YU BEN O DU?

Luku a tori disi: Sowan tu mun kaba, Hellen nanga Mike e hori nanga makandra. Ma gi Hellen a gersi leki a sabi Mike bun langa kaba. Heri dei den e app makandra. Son leisi den e bel makandra omeni yuru langa. Den sabi makandra so bun taki fosi a wan kaba taki, a trawan sabi kaba fa a e denki.

Den tu mun di pasa, Mike nanga Hellen ben e hori anu e waka èn wawan leisi den ben e bosi eife. Now Mike wani go moro fara, ma Hellen no wani. Ma a frede taki Mike o libi en. Na Mike wawan e gi en a firi taki en na a moro moi meisje di de. Tu fu en no de. Hellen e bribi tu taki a lobi Mike èn Mike lobi en.

Efu yu bigi nofo fu hori nanga wan sma, san yu ben o du efu yu ben de Hellen?

DENKI A TORI!

Seks na wan kado di Gado gi soso den sma di trow. Efu yu abi seks fosi yu trow, dan yu e pori a kado dati. A de neleki te yu ben o teki wan moi krosi di wan sma gi yu, dan yu e gebroiki en fu krin oso

Efu yu dyompo komoto fu wan bon fu di yu denki taki yu kan frei leki wan fowru, dan seiker yu o kisi bigi mankeri èn yu o firi en. Na so a de tu te yu pasa den wet fu Gado, leki a wan di e taki: „Un no musu du hurudu.”1 Tesalonikasma 4:3.

San kan pasa te yu e trangayesi a wet dati? Bijbel e taki: „A sma di e du hurudu, e sondu teige en eigi skin” (1 Korentesma 6:18). A sani dati tru?

 Sabiman kon si taki furu yongusma di abi seks fosi den trow, e firi en bakaten, fu di:

  • A E HATI DEN. Furu yongusma di abi seks fosi den trow, taki dati a ben hati den taki den du en.

  • DEN NO E FRUTROW SMA. Baka te den abi seks, ibriwan fu den e aksi densrefi: ’Nanga suma moro a ben abi seks?’

  • DEN NO KISI SAN DEN FRUWAKTI. Dipi na ini den ati, furu meisje wani wan boi di e gi den a firi taki den no abi fu frede noti. Den no wani wan sma di e hori nanga den soso fu di a wani abi seks. Furu boi feni taki efu wan meisje no abi probleem fu sribi nanga den, den e lasi lespeki gi so wan meisje.

  • San yu musu sabi na disi: Efu yu abi seks fosi yu trow, yu e lagi yusrefi. Na trowe yu e trowe wan diri sani (Romesma 1:24). Yu skin warti tumusi fu poti gi ala sortu sma.

Sori taki yu man hori yusrefi fu ’no du hurudu’ (1 Tesalonikasma 4:3). Èn efu wan dei yu trow, yu kan abi seks. Yu o man prisiri fu en èn yu no o abi den broko-ede di sma e kisi te den abi seks fosi den trow. Yu no o sari tu èn yu o man frutrow yu patna.Odo 7:22, 23; 1 Korentesma 7:3.

 SAN YU E DENKI?

  • Wan sma di lobi yu trutru ben o meki yu du wan sani di kan meki yu kon siki noso di kan hati yu kefalek?

  • Wan sma di lobi yu trutru o meki yu du wan sani di kan meki taki yu nanga Gado no de mati moro?Hebrewsma 13:4.