Go na content

Go na a tra menu

Go na table of contents

Yehovah Kotoigi

Sranantongo

Piki tapu 10 aksi di yongusma abi

 AKSI 9

Mi musu bribi na ini evolutie?

Mi musu bribi na ini evolutie?

FU SAN EDE A BUN FU TAKI FU DISI?

Efu na evolutie tru, dan na somaar wi e libi. Ma efu na wan sma meki ala sani, dan wi kan feni bun piki tapu aksi di abi fu du nanga a libi èn nanga a tamara fu wi.

SAN YU BEN O DU?

Luku a tori disi: Alex no sabi moro san a musu bribi. En heri libi kaba a e bribi na ini Gado èn taki na En meki ala sani. Ma tide a meneer di e gi biologie leri den taki na evolutie tru èn taki sabiman feni buweisi gi disi. Alex no wani meki sma denki taki a don. Dati meki a e taki na ensrefi: ’Efu sabiman abi buweisi taki na evolutie tru, dan suma na mi fu no bribi dati?’

Efu yu ben de Alex, yu ben o bribi na ini na evolutie soso fu di den skorobuku e leri dati?

DENKI A TORI!

Sma di e bribi na ini evolutie nanga sma di e bribi na ini Gado, gaw fu taki san den e bribi, sondro taki den sabi fu san ede den e bribi dati.

  • Son sma e bribi taki na Gado meki ala sani fu di na dati den leri na kerki.

  • Son sma e bribi taki na evolutie tru fu di na dati den leri na skoro.

 LUKU DEN SIKSI AKSI DISI

Bijbel e taki: „Ibri oso abi wan sma di meki en, ma a sma di meki ala sani na Gado” (Hebrewsma 3:4). Yu kan bribi san skrifi dya?

Nowan sma o taki dati na oso disi kon fu ensrefi. Dan fu san ede sma ben o taki dati libi kon fu ensrefi?

SON SMA E TAKI: Ala den stari nanga den planeiti kon fu di wan sani sutu panya wantronso.

1. Dan suma meki a sani disi sutu panya èn fa a du kon taki a sutu panya?

2. San moro makriki fu frustan: Ala sani kon fu ensrefi, noso na wan sma meki ala sani?

SON SMA E TAKI: Libisma kon fu meti.

3. Efu libisma kon fu meti soleki yapiyapi, dan fu san ede libisma koni omeni tron moro yapiyapi?

4. Fu san ede sma no man kaba frustan srefi fa den moro pikin libisani di de, e wroko?

SON SMA E TAKI: Buweisi de taki na evolutie tru.

5. A sma di taki a sani disi ondrosuku efu den buweisi disi de trutru?

6. Yu ben sabi taki furu sma e bribi na ini evolutie fu di sma taigi den taki ala sma di koni e bribi disi?

„Kon meki wi taki dati wan dei yu e waka na ini busi, dan yu si wan moi oso. Yu ben o taki dati na a fasi fa den bon fadon, meki na oso disi kon de? Nowan sma ben o taki so wan don sani. Dan fu san ede wi musu bribi taki ala sani kon fu ensrefi?”—Julia.

„Kon meki wi taki dati wan sma taigi yu taki wan sani sutu na wan presi pe den e druk buku. Ma dan enki spat go na tapu a muur nanga a plafon. Ne wán bigi wortubuku meki. Yu ben o bribi dati?”—Gwen.

 FU SAN EDE YU KAN BRIBI NA INI GADO?

Bijbel e gi a deki-ati fu gebroiki yu „frustan” (Romesma 12:1). Dus yu no musu bribi na ini Gado fu den sani disi nomo:

  • WAN FIRI DI YU ABI (Mi e firi taki wan moro hei makti musu de)

  • YU BIRTI (Na a presi pe mi e libi ala sma e bribi na ini Gado)

  • A FASI FA YU KWEKI (Mi papa nanga mama kweki mi na ini kerki, dus mi ben musu fu bribi na ini Gado)

Ma yu musu sabi fu san ede yu e bribi na ini Gado.

„Te mi e arki fa meneer e fruteri fa wi skin e wroko, mi no abi nowan tweifri taki wan Gado de. Ibri pisi fu wi skin abi en fasi fa a e wroko, srefi den moro pikinwan. Den e du a wroko fu den sondro taki wi sabi. Ai, a skin fu wi meki na wan kefalek moi fasi!”—Teresa.

„Te mi e si bigi oso, bigi sipi, noso wan wagi, mi e aksi misrefi: ’Suma meki a sani disi?’ A musu fu de wan sma di koni kefalek, fu di wagi abi omeni pikinpikin sani di musu wroko bun so taki a man rèi. Dus efu na wan sma meki a wagi, dan a musu fu de taki na wan sma meki libisma.”—Richard.

„O moro mi ben e stuka den sani di sabiman kon feni, o moro mi ben kon si taki na evolutie no tru. . . . Gi mi a moro muilek fu bribi na ini na evolutie, leki fu bribi taki wan Mekiman de.”—Anthony.

PRAKSERI A SANI DISI

Na omeni yari kaba sabiman e ondrosuku na evolutie, toku den no man agri nanga makandra ete fu a tori disi. Efu sabiman no man agri nanga makandra, aladi den e kari densrefi koniman, dan yu no denki taki yu mag tweifri na a leri disi?